Қаржы вице-министрі Ержан Біржанов жалға пәтер беріп, салық төлемейтін азаматтарды қалай анықтайтындарын түсіндірді.
Вице-министрдің айтуынша, Қаржы министрлігі пәтерді жалға беруден түсетін табысты заңды айналымға шығару бағытында жұмыс жүргізіп жатыр.
«Қазір біз әртүрлі жеңілдетілген салық режимдерін енгізіп жатырмыз. Соның бірі – арнайы салық тәртібі, оның аясында азаматтар тіпті жеке кәсіпкер ретінде тіркелмей-ақ жылына бір рет декларация тапсырып жұмыс істей алады», – деді Ержан Біржанов.
Оның айтуынша, мемлекеттік органдар камералдық бақылау арқылы пәтер иелерінің мәліметтерін салыстырады.
«Мысалы, егер бір азаматтың атына 10 пәтер тіркелген болып, өзі тек біреуінде тұратын болса, қалған 9 пәтердің жалға берілу ықтималдығы жоғары. Біз мұндай жағдайларды жергілікті өзін-өзі басқару ұйымдарымен және учаскелік инспекторлармен бірлесіп бақылап отырамыз. Егер пәтер иесі ай сайын мобильді аударым арқылы немесе басқа жолмен тұрақты төлем алып отырса, бізде сұрақтар туындайды», – деді вице-министр.
