Бүгін, 15:28
Астанаға алғаш рет келген NVIDIA компаниясының негізін қалаушы әрі басшысы Дженсен Хуанг Қазақстан Президентінің жасанды интеллектіні дамыту жоспарын жоғары бағалады.
Жасанды интеллект әлемдік экономиканы өзгертіп жатыр. Қазақстан да осы үдеріске белсенді қатысуды көздеп, AI технологияларын дамытуға басымдық беріп жатыр. Бұл туралы Астанаға алғаш рет келген NVIDIA компаниясының негізін қалаушы әрі басшысы Дженсен Хуанг мәлімдеді, деп хабарлайды kznews.kz.
«Президенті жасанды интеллектіні дамытуды ұлттық басымдық деп жариялаған елдердің ішінде Қазақстан – мен барған алғашқы мемлекет. Жасанды интеллект еліңізді жаңа деңгейге көтеруге, адамдардың мүмкіндіктерін кеңейтуге, сондай-ақ компаниялардың жаһандық нарықта бәсекеге қабілетті болып, ауқымын ұлғайтуына көмектеседі. Жасанды интеллект қоғамды өзгертеді», – деді Дженсен Хуанг.
Оның айтуынша, жаңа технологиялар қазақстандықтардың мүмкіндіктерін арттырып, отандық компаниялардың дамуына және халықаралық нарыққа шығуына жол ашады.
Астанадағы alem.ai орталығына барған кезде Дженсен Хуангқа Physical AI бағытындағы жаһандық хаб құру жоспарлары да таныстырылды. Бұл жобаны жүзеге асыру үшін Қазақстан инфрақұрылымды дамытып, білікті мамандар даярлауға және жаңа технологиялық шешімдерді әзірлеуге жағдай жасап жатыр.
NVIDIA басшысының сапары Қазақстанның жасанды интеллектіні дамытуға бағытталған бастамалары халықаралық технологиялық компаниялардың назарын аударып отырғанын көрсетті.
