25 қараша, 2025
Threads әлеуметтік желісінде продюсер әрі актер Нұрлан Қоянбаев ерекше бастама көтерді. Ол әр сәрсенбіні “Қазақстан күні” деп жариялап, осы күнді ел бірлігін нығайтуға арналған бейбіт әрі позитивті күн ретінде белгілеуді ұсынды, деп хабарлайды kznews.kz.
Қоянбаевтың айтуынша, сәрсенбі күні қазақстандықтар бір-бірімен сөзге келмей, дау-дамайсыз, жай ғана тыныштық пен өзара құрметті сақтау керек. Ол халықты осы күні еліміз туралы жағымды пікір, жылы лебіз және қуанышты жаңалықтар бөлісуге шақырды. Продюсердің пікірінше, аптаның дәл ортасында осындай позитивті бастама адамдардың көңіл-күйін жақсартып, қоғамдағы қажетсіз айғай-шуды азайтуға ықпал етеді.
Нұрлан Қоянбаевтың ұсынысы желі қолданушылары арасында талқыға түсті. Оның жазбасына өнер өкілдері де үн қосып, әртүрлі пікір қалдырды. Әнші Жазира Байырбекова әзіл-шыны аралас түрде: "Немесе аптасына 1 күн ғана ұрысуға рұқсат берейік" деп өз ойын білдіріп, желі қолданушыларының көңілін көтерді.
Желіде бұл бастамаға қолдау білдіргендер де, әзілмен қабылдағандар да бар. Дегенмен Қоянбаевтың ұсынысы қоғамда тыныштық пен позитивтің маңызын тағы бір мәрте атап өтуге себеп болды.
