Бүгін, 15:18
Қасым-Жомарт Тоқаев Нұрлан Байбазаровты Қазақстан Республикасы Президентінің экономикалық мәселелер жөніндегі көмекшісі етіп тағайындады. Тиісті жарлық 2026 жылғы 25 наурызда жарияланып, құжатта оның бұрынғы қызметінен босатылғаны да көрсетілді, деп хабарлайды kznews.kz.
Нұрлан Байбазаров – экономикалық және қаржы саласында ұзақ жыл еңбек еткен тәжірибелі басқарушы. Ресми өмірбаянына сүйенсек, ол 1975 жылы туған, Қазақ мемлекеттік басқару академиясын «Банк ісін ұйымдастыру» мамандығы бойынша тәмамдаған. Еңбек жолын 1997 жылы Қаржы министрлігінде бастап, кейін Қазақстанның Даму банкінде, Ұлттық экономика министрлігінде, Өнеркәсіпті дамыту қорында қызмет атқарған. 2023 жылы «Бәйтерек» холдингінің басқарма төрағасы болды.
Ал 2024 жылғы 6 ақпанда Нұрлан Байбазаров Қазақстан Республикасы Премьер-Министрінің орынбасары – Ұлттық экономика министрі лауазымына тағайындалған еді. Енді ол Президент Әкімшілігінде экономикалық мәселелер бағытына жауап беретін көмекші ретінде жұмысын жалғастырады.
