Бүгін, 21:10
Қазақстанда мүгедектік тағайындау мәселесіне қатысты тексерістер барлық өңірде басталды. Бұл туралы ҚР Еңбек және халықты әлеуметтік қорғау министрлігі мәлімдеді, деп хабарлайды kznews.kz.
Министрліктің хабарлауынша, тексерістерге Атырау облысында анықталған заңбұзушылық белгілері негіз болған. Атап айтқанда, азаматтарды сырттай-проактивті куәландыруға жолдау кезінде күмәнді жағдайлар тіркелген.
– Қолда бар материалдарға сәйкес, кейбір медициналық ұйым қызметкерлерінің және дәрігерлік-консультациялық комиссия төрағасының әрекеттерінде медициналық құжаттарға жалған мәлімет енгізу белгілері бар, – деп хабарлады ведомство.
Осыған байланысты министрлік барлық өңірлік бөлімшелерге тексеріс жүргізуді тапсырды.
Сонымен қатар анықталған фактілер бойынша материалдар құқық қорғау органдарына жолданған.
Ведомство өкілдері мүгедектік тағайындау процесінің ашықтығын қамтамасыз ету және заңсыз әрекеттердің алдын алу үшін бақылау күшейтілетінін атап өтті.
