18 шілде, 2025
Шілденің үшінші жексенбісі – Қазақстанда металлургтер күні ретінде аталып өтеді. Бұл – елдің өндірістік әлеуетін қалыптастырып отырған мыңдаған еңбек адамдарының кәсіби мерекесі. Металлург – от пен жалынның ортасында жүріп, кеннен таза металл алатын, нағыз қажыр-қайратты, төзімді маман. Олардың тынымсыз еңбегінің арқасында еліміздің экономикасы дамып, өнеркәсібі өркендеуде.
Қазақстан – әлемдегі жетекші мыс өндіруші елдердің бірі. Статистикаға сүйенсек, 2024 жылы елімізде 470 мың тоннадан астам мыс өндірілген. Бұл көрсеткішпен Қазақстан дүниежүзіндегі 10 ірі мыс өндіруші мемлекеттің қатарында. Еліміздің түсті металлургия саласында Жезқазған өңірінің орны ерекше. Мұнда әлемдегі ең ірі мыс кен орындарының бірі орналасқан.
Жезқазғанның бүгінгідей ірі өндіріс орталығына айналуына Қаныш Имантайұлы Сәтбаевтың сіңірген еңбегі орасан. Ол өткен ғасырдың 30-жылдары бұл аймақтағы мыс қорының мол екенін ғылыми тұрғыда дәлелдеп, Жезқазған кен орнын игеру идеясын ұсынды. Кейін бұл бастама жүзеге асып, 1938 жылы Жезқазған мыс балқыту зауыты іске қосылды. Бұл зауыт тек Жезқазған үшін емес, бүкіл Одақ көлемінде маңызды кәсіпорынға айналды.
Мыс – қазіргі заманғы технологиялардың ажырамас бөлігі. Ол электр энергиясын жақсы өткізетін қасиетіне байланысты энергетика, байланыс, көлік, құрылыс, тіпті жасанды интеллект пен жасыл энергетика салаларында кеңінен қолданылады. Сондықтан мыстың нарықтағы бағасы мен оған деген сұраныс жылдан-жылға артып келеді. Мысалы, 2025 жылдың бірінші жартысында бір тонна мыстың әлемдік орташа бағасы 8 400 АҚШ долларына жетті.
Бүгінгі таңда елімізде мыңдаған адам металлургия саласында еңбек етеді. Олардың әрқайсысы – үлкен өндіріс механизмінің маңызды бөлігі. Жоғары температура, ауыр еңбек жағдайы мен тәуекелге толы жұмыс – металлургтердің күнделікті өмірі. Дегенмен олардың еңбегі тек зауыт аумағында ғана емес, тұтас ел экономикасында көрініс тауып отыр.
