Бүгін, 12:38
11-12 маусым күндері Сәрсемәлиев ісі бойынша өткен сот отырысында тергеу материалдарындағы дәлелдемелерді зерттеу жалғасты, деп хабарлайды kznews.kz.
"Ақ Жайық" басылымының жазуынша, Сотта Сәрсемәлиевтің тергеу кезінде Наурыз Мұқанғалиевті қалай өлтіргенін айтып берген видеосы көрсетілді. Денеге эксгумация жасалған кезде басы денесінен ажырап кеткен. Мәйіт он айдан кейін қазып алынған.
Сондай-ақ Сәрсемәлиевті Жангелдиндегі үйге және қаладағы үйге апарған кезде түсірілген видеолар, сондай-ақ оның тергеу кезінде берген жауаптарының бейнежазбалары көрсетілді.
Бүгін сотта оның бұрынғы қайын атасы мен қайын енесі – Мақсот Мұқанғалиев пен Нәсіп Өтешқалиеваны Жангелдиндегі сарайда қалай пышақтап өлтіргенін баяндаған видеосы көрсетілді.
Тергеу видеосында Сәрсемәлиев: «Егер мен қазір тоқтап қалсам, өзім өлемін, балаларымды алып қояды, бітті», – дейді. Ол Нәсіп Өтешқалиеваны өлтіруге бет алғанын айтқан. Қайын енесі сарайда ыдыс жинап жүрген кезде, ол асүй пышағын алдын ала дайындап, үстелдің үстіне қойған. Әйел артында адам тұрғанын байқап, бұрылған сәтте, ол алдымен мойнына, кейін жүрек тұсына пышақ сұққан. Осыдан кейін әйел жансыз күйде жерге құлаған.
Кейін ол сарайға қарай келе жатқан Мақсот Қарабалинді де өлтірмек болғанын, екеуін де қасақана өлтіргенін айтқан.
Видеолардың бірінде Сәрсемәлиев өзінің «қаны қайнап тұрғанын» айтады. Өйткені ол Қарабалинді де қасақана өлтіруге бара жатқанын жеткізген: «Мен жайдан-жай бара жатқан жоқпын, қасақана кісі өлтіруге бара жатырмын, бұл ауыр», – дейді ол.
Қылмыс жасап, мәйіттерді сарайға көміп тастағаннан кейін, ол пышақты жуып, қаптамасына салып, өзімен бірге алып кеткен.
Бұдан кейін қаза тапқандардың, Сәрсемәлиевтің және оның бұрынғы әйелі Ақбаян Мұқанғалиеваның абоненттік нөмірлерінің қосылған уақыты мен орналасқан жеріне қатысты жасырын тергеу әрекеттерінің нәтижелері қаралды. Ақбаян Мұқанғалиева қазір психиатриялық диспансерде ем қабылдап жатыр.
Тергеу мәліметінше, Наурыз Мұқанғалиев, Мақсот Қарабалин, Нәсіп Өтешқалиева, Мейрамгүл Қарабаллина, Ақбаян Мұқанғалиева және Сәрсемәлиевтің SIM-карталары, яғни абоненттік нөмірлері белгілі бір кезеңдерде бір жерде қатар тіркелген.
Наурыздың SIM-картасы былтыр мына жерлерде тіркелген:
- 20-25 маусым аралығында – Махамбет ауданында;
- 2-5 қараша аралығында – Жангелдин ауылында;
- 5-7 қараша аралығында – Мұнайшы шағынауданында;
- 9 желтоқсанда – Шымкентте.
Ақбаян Мұқанғалиеваның нөмірі:
- 3-5 қараша аралығында – Жангелдинде;
- 5-6 қараша аралығында – Мұнайшыда;
- 8-9 желтоқсан аралығында – Шымкентте тіркелген.
Мемлекеттік айыптаушы: "Бұл Мақсот Қарабалиннің, Нәсіп Өтешқалиеваның, Наурыз Мұқанғалиевтің және Сұлтан Сәрсемәлиевтің нөмірлері бір жерде болғанын көрсетеді", – деді.
