Қазақстан Республикасының Президенті Қасым-Жомарт Тоқаев Бішкекте өткен Ұжымдық қауіпсіздік шарты ұйымы (ҰҚШҰ) Ұжымдық қауіпсіздік кеңесінің кезекті саммитіне қатысты. Жиынға Қырғыз Республикасының Президенті Садыр Жапаров, Беларусь Президенті Александр Лукашенко, Ресей Президенті Владимир Путин және Тәжікстан Президенті Эмомали Рахмон қатысты, деп хабарлайды kznews.kz.
Саммит аясында мемлекеттер басшылары халықаралық және өңірлік қауіпсіздіктің өзекті мәселелері жөнінде пікір алмасып, ҰҚШҰ-ға мүше елдердің ұжымдық қауіпсіздігін қамтамасыз етуге қатысты негізгі бағыттарды талқылады. Ресми делегациялар қатысқан кеңейтілген құрамдағы отырыста ұйымның биылғы жұмысы қорытындыланып, алдағы кезеңге арналған басымдықтар айқындалды.
Президенттер ҰҚШҰ Бас хатшысы лауазымындағы қызметін аяқтап жатқан Иманғали Тасмағамбетовке алғыс білдірді. Сонымен қатар 2026 жылғы 1 қаңтардан бастап үш жыл мерзімге Бас хатшы қызметіне Қырғыз Республикасының өкілі Таалатбек Масадыковты тағайындау туралы шешім бекітілді.
Саммит қорытындысы бойынша Ұжымдық қауіпсіздік кеңесінің декларациясы қабылданып, ұйымға мүше мемлекеттердің мүддесіне сай ұжымдық қауіпсіздік жүйесін жетілдіруге бағытталған бірқатар құжатқа қол қойылды.
