31 қаңтар, 2026
Ресейдің Уфа қаласында мектеп мұғалімінің оқушыға күш қолданған сәті видеоға түсіп қалды. Оқиға сынып ішінде орын алып, әлеуметтік желілерде кеңінен тарады. Бұл туралы SHOT Telegram-арнасы мәлімдеді, деп хабарлайды kznews.kz.
Инцидент №161 лицейде еңбек сабағы барысында болған. Мәліметке қарағанда, 7-сынып оқушысы сабақтың өтуіне кедергі жасап, балағат сөздер айтып, Чебурашка кейіпкерінің әдепсіз суретін салған. Мұғалім оқушының бұл әрекетіне ашуланып, оны тақтаға шығарып, қолын байлап, бүкіл сыныптың көзінше белдікпен ұрған.
Оқиға сәтін оқушылардың бірі видеоға түсіріп алған. Кейін бұл бейнежазба интернетте тарап, қоғамда қызу талқыланды.
Аталған жағдайға байланысты Башқұртстан прокуратурасы тексеру бастады. Құқық қорғау органдары оқу орны басшылығы мен мұғалімнің әрекетіне құқықтық баға беріп, тексеру қорытындысы бойынша тиісті шаралар қабылдайтынын мәлімдеді.
