Бүгін, 17:26
Димаш Құдайбергеннің Латын Америкасындағы концерттік туры қарсаңында Мексикадағы жанкүйерлері ерекше шығармашылық жоба жүзеге асырды, деп хабарлайды kznews.kz.
Мексикалық Dears фан-қоғамдастығының мүшесі, әуе шарларынан композициялар жасайтын суретші Ольга Лидия Эрнандес шығармашылық тобы және Dimash & Dears Regias фан-клубының қатысушыларымен бірге Димаштың биіктігі 4,5 метр болатын мүсінін жасап шыққан.
Ерекше инсталляция Нуэво-Леон штатындағы Монтеррей қаласының ірі сауда орталықтарының біріне қойылды. Дәл осы қалада 2026 жылғы 14 қарашада Димаш Құдайбергеннің жаңа DiMENSIONS әлемдік туры аясындағы концерті өтеді.
Жобаны ұйымдастырушылардың айтуынша, бастаманың басты мақсаты – Монтеррей тұрғындарын қазақстандық әншінің шығармашылығымен таныстырып, алдағы концертке қызығушылықты арттыру. Қазірдің өзінде алып мүсін сауда орталығына келушілердің назарын аударып, көпшілік суретке түсетін ерекше нысанға айналған.
Димаш Құдайбергеннің Латын Америкасындағы жанкүйерлер қауымы соңғы жылдары айтарлықтай кеңейіп келеді. Сондықтан Мексикада өтетін концертке деген қызығушылық жоғары екені айтылып, жанкүйерлер әншіні ерекше форматта қарсы алуға дайындалып жатыр.
