16 қаңтар, 2026
16 қаңтарға қараған түні Маңғыстау облысында KZ-11 автожолында Yutong маркалы жолаушылар автобусы жол апатына ұшырап, төрт адам оқиға орнында көз жұмды, тағы үш жолаушы жарақат алды, деп хабарлайды kznews.kz.
Көлік министрлігінің айтуынша, оқиға 16 қаңтар күні шамамен 01:03-те KZ-11 «Доссор – Құлсары – Бейнеу – Сайөтес – Шетпе – Жетібай – Ақтау» бағыты өтетін тасжолдың 383-шақырымында болған. Алдын ала дерек бойынша, Ақтау қаласынан Бейнеу ауылы бағытына бет алған автобустың жүргізушісі рульге ие бола алмай қалған. Соның салдарынан көлік аударылып кеткен.
Ведомство мәліметінше, автобус 2025 жылдың 19 желтоқсанында техникалық байқаудан өткен. Сондай-ақ көлік «CASPIAN TRANS CORPORATION» LLC компаниясында тіркелгені айтылды. Оқиға болған учаске техникалық II санатқа жатады.
Көлік министрлігі жол жамылғысы асфальтбетонды екенін, жолдың ені 9 метрді құрайтынын хабарлады. Тексеру барысында жол жамылғысында ақаулар анықталмаған. Жол белгілері бекітілген дислокацияға сәйкес толық көлемде орнатылғаны көрсетілген.
Апат салдарынан автобуста болған 50 жолаушының төртеуі оқиға орнында қаза тапты. Тағы үш адам әртүрлі дәрежеде жарақат алып, медициналық мекемелерге жеткізілді. Ресми ақпаратта автобус тізгінінде 1985 жылы туған жүргізуші болғаны, ал жол-көлік оқиғасы орын алған жерден шамамен 200 шақырым бұрын екінші жүргізушіге ауысқандығын айтты.
Қазір бұл факті бойынша Маңғыстау облысы Полиция департаменті оқиғаның барлық мән-жайын анықтауға бағытталған тергеу шараларын жүргізіп жатыр.
