21 қаңтар, 2026
Мәжіліс депутаты Бақытжан Базарбек Әлеуметтік медициналық сақтандыру қорындағы (ӘМСҚ) қаражаттың заңсыз жұмсалуына және «СҚ-Фармация» компаниясына қатысты жүргізіліп жатқан тергеуге байланысты пікір білдірді, деп хабарлайды kznews.kz.
Еске салайық, өткен жылы Бақытжан Базарбек әріптесі Мұрат Әбеновпен бірге берген өтініштің негізінде «СҚ-Фармация» ЖШС-не қатысты қылмыстық іс қозғалғанын хабарлаған еді.
Депутаттың айтуынша, аталған компанияға қатысты тергеу жалғасып жатыр.
"СҚ-Фармация" бойынша жақын арада қосымша ақпарат беріледі. Қылмыстық іс қозғалды, қазіргі таңда тергеу амалдары жүргізілуде", - деді ол Мәжілісі кулуарында журналистерге.
Сондай-ақ Базарбек Әлеуметтік медициналық сақтандыру қорына қатысты да мәлімдеме жасап, қаржы жымқыру деректері бойынша Бас прокуратураға арыз жолданатынын айтты.
"Осы аптада әлі құқықтық баға берілмеген фактілер бойынша Бас прокуратураға өтініш түсіреміз. Бұған дейін жауапкершілікке тартылмаған тұлғалар бар. Әңгіме МӘМС жүйесіне қатысы жоқ лауазымды адамдар туралы болып отыр. Олар міндетті түрде жауап беруі тиіс. Қаражат ұрланған, сондықтан әділ жаза болуы керек", - деді депутат.
Айта кетейік, бүгін Үкімет басшысы Олжас Бектенов те медициналық сақтандыру қорындағы жемқорлық фактілеріне қатысты пікір білдіріп, кінәлі тұлғалар заң аясында жауапқа тартылатынын мәлімдеді.
