Бүгін, 14:15
Роза Бағланова атындағы «Қазақконцерт» мемлекеттік академиялық концерттік ұйымында қазақтың дәстүрлі ән-күй өнерін дәріптеуге арналған жаңа концерттер циклі басталды. Жобаның алғашқы кеші «Арқа өңірінің ән-күй мұрасы» тақырыбында өтті.
Жаңа мәдени жоба қазақ халқының ғасырлар бойы қалыптасқан әншілік және күйшілік мектептерін кеңінен таныстыруды көздейді, деп хабарлайды kznews.kz.
Ұйымдастырушылар концерттік маусым аяқталғанға дейін еліміздің әр өңірінің музыкалық мұрасына арналған сегіз концерт өткізуді жоспарлап отыр.
Алғашқы концерт қазақтың дәстүрлі музыка өнерінде ерекше орны бар Арқа мектебіне арналды. Кеш барысында сал-серілер дәстүрі мен шертпе күй өнерінің үздік туындылары орындалды.
Сахна төріне көтерілген белгілі дәстүрлі әншілер мен күйшілер Біржан сал, Ақан сері, Жаяу Мұса, Тәттімбет және Ықылас секілді қазақ музыкасының көрнекті өкілдерінің шығармаларын көрермен назарына ұсынды.
Арқа әншілік мектебі кең тынысты әуенімен, терең мазмұнымен және орындаушылық шеберлігімен ерекшеленеді. Ал шертпе күй дәстүрі қазақ халқының дүниетанымын, философиялық ойы мен жан дүниесін домбыра үні арқылы жеткізетін ұлттық өнердің маңызды саласы саналады.
Америкалық домбырашы көрерменді тәнті етті
Концерттің ерекше сәттерінің бірі АҚШ-тан келген музыкант Geoff Gersh-тің сахнаға шығуы болды. Америкалық өнерпаз қазақтың дәстүрлі аспабы домбырамен Қыздарбек Төребайұлының әйгілі «Сылқым қыз» күйін орындады.
Шетелдік музыканттың қазақ күйіне қызығушылық танытып, оны сахнада орындауы ұлттық өнердің географиялық шекарадан асып, халықаралық деңгейде танылып келе жатқанын көрсетеді.
Ұйымдастырушылардың айтуынша, концерттер циклі тек музыкалық шығармаларды орындаумен шектелмейді. Жобаның басты мақсаты – қазақтың өңірлік өнер мектептерінің ерекшелігін таныту, дәстүрлі музыканы насихаттау және ұрпақтар арасындағы рухани сабақтастықты сақтау.
Алдағы концерттерде еліміздің өзге өңірлеріне тән әншілік және күйшілік дәстүрлер көпшілік назарына ұсынылады.
Осылайша, «Қазақконцерт» сахнасында басталған жаңа жоба ұлттық музыкалық мұраны сақтап қана қоймай, оны жаңа аудиторияға таныстыруға мүмкіндік бермек.
