Бүгін, 10:35
Иранның солтүстігінде орналасқан стратегиялық маңызы жоғары Бендер-Энзели қаласына зымырандық шабуыл жасалғаны туралы ақпарат тарады. Бұл туралы аталған қаланың әкімі Мохаммад Салех Зиаи мәлімдеді, деп хабарлайды kznews.kz.
Оның айтуынша, қалаға АҚШ пен Израиль тарапынан жасалған шабуыл нәтижесінде бірқатар маңызды нысандар зақымданған. Атап айтқанда, кеден ғимараттары, порт басқармасы және кеме қатынасы ұйымының нысандары соққы астында қалған.
Қала басшысы қазіргі таңда адам шығыны тіркелмегенін атап өтті. Зардап көлемі әлі толық анықталып жатыр. Сонымен қатар, жергілікті билік жағдайдың толық бақылауда екенін мәлімдеді.
Израильдік бұқаралық ақпарат құралдары өз дереккөздеріне сілтеме жасай отырып, Бендер-Энзели порт инфрақұрылымына айтарлықтай зиян келгенін хабарлады. Мәліметтерге сәйкес, шабуыл тек әуе арқылы ғана емес, теңіз бағытынан да жүргізілген.
Бендер-Энзели – Иранның Каспий теңізіндегі ең ірі порттарының бірі. Ол елдің солтүстігінде орналасқан және Иран, Ресей және өңірдегі басқа мемлекеттер арасындағы жүк тасымалы үшін маңызды сауда-логистикалық хаб болып саналады. Бұл порт Каспий өңіріндегі көлік дәліздерінің маңызды буыны ретінде стратегиялық рөл атқарады.
Сарапшылардың пікірінше, мұндай шабуылдар аймақтағы геосаяси ахуалды ушықтырып, халықаралық сауда байланыстарына әсер етуі мүмкін.
