Бүгін, 20:49
Иранға қатысты тараған дерек әлем назарын өзіне аударды. АҚШ-тың Time журналы Иран Денсаулық сақтау министрлігінде қызмет ететін екі жоғары лауазымды шенеуніктің мәлімдемесіне сүйеніп, 8–9 қаңтар күндері ел көшелерінде 30 мыңға жуық адам көз жұмған болуы ықтимал екенін жазды, деп хабарлайды Kznews.kz.
Журнал келтірген ақпаратта аталған күндері қауіпсіздік құрылымдары жүргізген операциялардан кейін қаза тапқандар саны тым көп болғаны сонша, мемлекет мәйіттерді тасымалдау мүмкіндігінен толықтай айырылғаны айтылады. Дереккөздер қысқа уақытта мәйіт қаптары таусылып, жедел жәрдем көліктері әдеттегі қызметін атқара алмай қалғанын атап өтеді. Осыған байланысты мәйіттерді тасымалдауға 18 доңғалақты жартылай тіркемелі ауыр жүк көліктері де тартылғаны көрсетілген.
Сондай-ақ үкімет ішінде жасалған, алайда әзірге жұртшылыққа жарияланбаған есептеулердегі болжамды сан Иранның жоғарғы көшбасшысы аятолла Хаменеи төңірегіндегі топтар айтқан 3117 адамдық ресми көрсеткіштен бірнеше есе жоғары екені де жазылған.
Бұл дерек тәуелсіз құқық қорғаушылар жинаған мәліметтерден де айтарлықтай көп. АҚШ-та орналасқан HRANA адам құқықтары агенттігінің соңғы дерегіне сәйкес, қазіргі уақытқа дейін 5459 өлім фактісі расталған, ал тағы 17 031 оқиға тексеру сатысында тұр.
