Бүгін, 12:23
Марқұм Яна Легкодимованың анасы қызының өліміне кінәлі деп танылған сотталғандардың жазасын қай жерде өтеп жатқанын білмек болған. Ол осы сұрақпен Қылмыстық-атқару жүйесі комитетіне жүгінгенімен, нақты жауап ала алмаған, деп хабарлайды kznews.kz.
"Ақ Жайық" басылымының мәліметінше, Галина Легкодимоваға жолданған ресми жауапта сотталғандардың заңды күшіне енген үкім бойынша қылмыстық-атқару жүйесі мекемелерінде жазасын өтеп жатқаны ғана айтылған. Ал олардың нақты қай мекемеде отырғаны құпия ақпарат ретінде көрсетілмеген.
Комитет сотталған адамның басқа мекемеге ауыстырылғаны туралы мәлімет тек оның жақын туыстарына немесе сотталған адамның өзі көрсеткен адамдарға ғана берілетінін түсіндірген. Сондай-ақ жеке іс құжаттарындағы деректер жария етілмейтіні айтылған.
Басылымның жазуынша, қазір сотталғандардың қайда жазасын өтеп жатқанына қатысты түрлі болжамдар тарап жатыр. Бұған дейін олардың өмір бойына бас бостандығынан айырылғандар отыратын "Қара бүркіт" мекемесіне жіберілгені айтылған. Алайда бұл ақпарат та, кейін шыққан басқа бейресми деректер де ресми түрде расталған жоқ.
Галина Легкодимова мұндай сұрауды жай қызығушылықпен емес, қызын өлтірген адамдардың заңда қарастырылған тиісті мекемеде жазасын өтеп жатқанына көз жеткізу үшін жолдағанын айтты.
"Мен енді ғана өз-өзіме келе бастадым. Бұл сұрауды олардың шынымен тиісті жерде отырғанын білу үшін ғана жібердім. Жаңа өмір бастап, басқа қалаға көшіп, әрі қарай өмір сүруді үйренгім келді. Бірақ бұл оқиға әлі де жанымды жібермей тұр. Маған олардың өмір бойына бас бостандығынан айыру жазасын өтеп жатқанын және мұндай қылмыс жасаған адамдарға арналған жағдайда отырғанын білу маңызды", – деді марқұмның анасы.
Еске салайық, қайғылы оқиға 2024 жылдың 18 қазанында болған. Яна Легкодимова танысының қоңырауынан кейін үйінен шығып кеткен. Ол тіпті сырт киімін де алмапты. Қыз көлікке отырғаннан кейін оны ешкім көрмеген.
Анасы іссапардан оралған соң бірден дабыл қаққан. Тергеу кезінде полиция Яна Легкодимованың күнделігін тауып, онда Р. есімді жігіттің аты аталғанын анықтаған. Кейін осы дерек арқылы 24 жастағы Ризуан Хайржанов пен 25 жастағы Алтынбек Қамитов анықталған.
