Бүгін, 12:28
Марқұм Яна Легкодимованың анасы қызының өліміне кінәлі деп танылған адамдардың нақты қай түзеу мекемесінде жазасын өтеп жатқанын біле алмай жүргенін айтты, деп хабарлайды kznews.kz.
Осы мәселе бойынша ол Қылмыстық-атқару жүйесі комитетіне ресми сауал жолдаған. Алайда ведомство сотталғандардың заңды күшіне енген сот үкімі негізінде қылмыстық-атқару жүйесі мекемелерінде жазасын өтеп жатқанын ғана хабарлаған. Ал олардың нақты қай колонияда отырғаны туралы мәлімет берілмеген.
Комитеттің түсіндіруінше, сотталған адамның басқа мекемеге ауыстырылғаны туралы ақпарат тек оның жақын туыстарына немесе сотталған адамның өзі көрсеткен тұлғаларға ғана беріледі. Сондай-ақ жеке іс материалдары құпия дерек саналады.
Бұған дейін әлеуметтік желілерде сотталғандардың өмір бойына бас бостандығынан айырылғандарға арналған «Қара бүркіт» колониясына жіберілгені туралы ақпарат тараған. Алайда бұл мәлімет ресми түрде расталмаған.
Марқұмның анасы бұл сұрақты жай қызығушылық үшін қоймағанын айтты. Оның сөзінше, ол сот үкімінің толық орындалып жатқанына және кінәлілердің заңда қарастырылған тиісті мекемеде жазасын өтеп отырғанына көз жеткізгісі келеді.
Әйел қызының қазасы әлі күнге дейін жанына ауыр тиетінін жеткізді. Ол үшін бұл жағдай жабылмаған жара болып қалған.
Еске салайық, Яна Легкодимова 2024 жылғы 18 қазанда жоғалып кеткен. Кейін тергеу барысында күдіктілер анықталып, қылмыстық іс сотқа жолданған.
