Жақында ғана әпкесі мас күйінде көлік жүргізіп, 15 тәулікке қамалып шыққан Павлодар облысының әкімі Асаин Байханов жаңа жылды «ет тұздап» бастады, деп хабарлайды Ulysmedia.
Асаин Байханов Threads желісіне суретін жариялап, сойылған соғым етін тұздап жатқанын жазды.
«2026 жылдың алғашқы кешін кім қалай өткізіп жатыр? Мен болсам соғымды реттеп, қазы тұздауға кірістім. Қатаң сынға алмаңыздар, інішектің түсіріп алған фотосы», – деп жазды.
Ұлттық статистика бюросы департаментінің желтоқсан айындағы дерегі бойынша, Павлодар облысында азық-түлік тауарлары тобында ет (ет өнімдерін қоса алғанда) 2,3%-ға, майлар мен тоң майлар – 0,9%-ға, кондитерлік өнімдер – 0,5%-ға, сүт өнімдері – 0,4%-ға, нан өнімдері мен жарма 0,2%-ға қымбаттаған.
Желтоқсанда Асаин Байхановтың әпкесі Айгүл Байханованың мас күйінде көлік жүргізгені үшін 15 тәулікке қамалғаны туралы айтылған болатын. Сол уақытта Асаин Байхановтың өзі Threads-те барлық азаматтар заң алдында тең деп жазба жариялаған.
