22 сәуір, 2026
Үндістанның Мадхья-Прадеш штатындағы Сатна қаласында 11 жастағы бала өз үйінде қаза тапты. Полиция мәліметінше, бұл қылмыс баланың анасы күдіктінің некеге тұру туралы ұсынысынан бас тартқаны үшін кек алу мақсатында жасалған, деп хабарлайды kznews.kz NDTV арнасына сілтеме жасап.
Қайтыс болған Шиврадж Раджак 5-сынып оқушысы болған, жақындары оны «Бадал» деп атайтын. Таңғы шамамен 10:30-да үйде жалғыз қалған балаға 45 жастағы Матура Раджак кіріп келген. Тергеу деректеріне сәйкес, ер адам балаға орақпен ауыр соққы беріп, оны өлтірген. Кейін мәйітті көк түсті пластик бөшкеге салып, үстін киіммен жауып, үйді құлыптап, ізін суытқан.
Қайғылы оқиға шамамен 13:30-да анықталған. Сол кезде үйге келген баланың әпкесі Седжал есік жабық екенін көріп, іште ешкім жауап бермеген соң күдік туады. Терезеден қарағанда үйде жарық пен желдеткіштің қосулы тұрғаны байқалған. Кейін полиция шақырылып, есік бұзылып ашылғанда бөшкенің ішінен баланың мәйіті табылған.
Седжалдың айтуынша, Матура Раджак бірнеше жылдан бері олардың анасы Аша Раджакқа үйлену туралы ұсыныс жасап, қысым көрсетіп келген. Анасы бұл ұсыныстардан үнемі бас тартып отырған. Сондай-ақ күдіктінің бұған дейін де отбасыға қоқан-лоқы көрсеткені, «баланың өзі үшін жауап береді» деп қорқытқаны айтылады.
Полиция дерегіне сәйкес, оқиғадан бір күн бұрын күдікті мен баланың анасы арасында жанжал болған. Кейін әйелдің жұмыс берушісі ер адамға тиіспеуді ескерткен. Тергеушілер осы жанжалдан кейін күдікті баланы үйде жалғыз қалған сәтін пайдаланып, қылмыс жасаған деп болжайды.
Оқиға орнында сот-медициналық сараптама тобы жұмыс істеп, қылмыс құралы табылған. Күдікті үйі мен дүкенін жауып, телефонын сөндіріп қашып кеткендіктен, оны іздеуге үш полиция тобы жұмылдырылған.
Матура Раджак келесі күні кешке ұсталып, қамауға алынды. Қазір ол тергеуде, барлық мән-жайлар анықталуда. Тергеудің негізгі нұсқасы — анасына айтылған ұсыныстың қабылданбауына байланысты кек алу.
Қайтыс болған баланың әкесі Нашик қаласында қара жұмыс істейді, анасы үй қызметкері болып еңбек етеді. Қайғылы сәтте бала үйде жалғыз болған.
