Ақтөбе облысында Қытай компаниясының қатысуымен ауқымды металлургиялық жоба іске асырылмақ. Жергілікті биліктің мәліметінше, өңірде толық циклді металлургиялық өндіріс базасын салу жоспарланып отыр, деп хабарлайды kznews.kz.
Жобаның жалпы құны 83,3 млрд теңгеге бағаланып, кәсіпорын жылына 1 миллион тоннаға дейін өнім өндіруге қауқарлы болады.
Болашақ зауытта арматура, бұрышты профильдер, швеллер, қосутавр арқалықтары және сым өнімдері шығарылып, олар ішкі нарықпен қатар экспортқа да бағытталады. Кәсіпорын іске қосылған жағдайда шамамен 300 адам тұрақты жұмыспен қамтылады.
Қазіргі таңда инвесторға жер телімін бөлу мәселесі қарастырылып жатыр. Жоба үшін Ақтөбе қаласы аумағынан 50 гектар жер учаскесі ұсынылған. Егер жер ресми түрде бекітілсе, құрылыс жұмыстары басталып, нысан шамамен екі жыл ішінде пайдалануға берілуі мүмкін.
Айта кетейік, Қытай капиталы Қазақстанның өзге өңірлеріне де тартылып жатыр. Бұған дейін Түркістан облысында қытайлық инвестордың қатысуымен индустриялық парк салу жоспарланғаны хабарланған болатын. Бұл жоба Мақтаарал ауданындағы «Орталық Азия» халықаралық өнеркәсіптік кооперация орталығы аумағында жүзеге аспақ. Мұндай бастамалар Қазақстанның өңдеу өнеркәсібін дамытуға және жаңа жұмыс орындарын ашуға бағытталған.
