Бүгін, 19:48
Астанада екі ұлының көзінше қаза тапқан 31 жастағы Сания Әлімжанованың өліміне қатысты іс сотта қаралады. Алайда сотта күдікті Ержан Иманқұловқа жаза тағайындау емес, оған медициналық сипаттағы мәжбүрлеу шараларын қолдану мәселесі қаралмақ. Бұл жағдай марқұмның туыстарының мүддесін қорғап жүрген белсенділердің наразылығын тудырды.
Құқық қорғаушы Дина Таңсәрінің мәліметінше, 28 қазанда Астана қаласының қылмыстық істер жөніндегі мамандандырылған ауданаралық сотының судьясы Айжан Құлбаева істі сот талқылауына тағайындаған.
Келесі сот отырысы 6 қарашада өтуі тиіс.
Дина Таңсәрі әлеуметтік желідегі парақшасында іс бойынша қабылданған шешімге қатысты пікір білдіріп, марқұмның полицияға хабарласқан сәтіндегі аудиожазбасын жариялаған.
Құқық қорғаушының айтуынша, сотта Ержан Иманқұловтың қылмыстық жауаптылығы мәселесімен қатар, оның психикалық жағдайына байланысты медициналық сипаттағы мәжбүрлеу шараларын қолдану қажеттігі қаралады.
«Бірақ сотта кісі өлтіру ісі емес, Ержан Иманқұловты мәжбүрлеп емдеу туралы қаулы қаралады», – деп жазды Дина Таңсәрі.
Белсендінің сөзінше, прокуратура күдіктінің психикалық жағдайына жүргізілген сараптамалардың қорытындысына сүйеніп отыр.
Құқық қорғаушы жариялаған мәліметтерде ер адамның оқиға кезінде орташа дәрежедегі депрессиялық күйде болғаны, ал қазіргі уақытта оның жадында оқиғаға қатысты ақаулар бар екені айтылған.
Алайда Дина Таңсәрі мен «НеМолчиKZ» қоры мұндай қорытындылардың негізділігіне күмән келтіріп отыр.
«Біз биыл наурыздан бері оның кісі өлтіру ісі бойынша сот алдында жауап беруін талап етіп келеміз», – деді құқық қорғаушы.
Дина Таңсәрі тәуелсіз сарапшының пікіріне де назар аударған. Оның айтуынша, сарапшы күдіктінің өз жағдайын шын мәніндегіден басқаша көрсетуі мүмкін екенін жоққа шығармаған.
Сонымен қатар белсенді прокуратура сүйенген F07.8 диагностикалық санатына қатысты сұрақ көтерді. Аталған код мидың аурулары, зақымдануы немесе қызметінің бұзылуымен байланысты психикалық және мінез-құлықтық өзгерістердің жекелеген түрлерін қамтиды.
Құқық қорғаушының пікірінше, диагноздың атауы ғана адамның оқиға сәтінде өз әрекетінің мәнін түсіну және оны басқару қабілетін анықтауға жеткіліксіз. Сондықтан ол сараптама материалдарын жан-жақты қарауды талап етіп отыр.
Дина Таңсәрі күдіктінің ауруханада емделу кезеңіне қатысты медициналық құжаттан үзінді де жариялаған. Белсендінің айтуынша, ондағы мәліметтер қосымша тексеруді қажет етеді.
Сания Әлімжанованың өлімі туралы не белгілі?
Қайғылы оқиға 2025 жылғы 19 маусымда Астанада болған.
Жарияланған ақпаратқа сәйкес, 31 жастағы Сания Әлімжанова өз үйінде екі баласының көзінше қаза тапқан. Оқиға кезінде оның 7 және 10 жастағы ұлдары болған.
Құқық қорғаушының мәліметінше, әйел шабуыл кезінде полицияның 102 нөміріне хабарласып үлгерген. Балалардың дабылынан кейін көршілер көмекке келген.
Аталған оқиғаға байланысты Ержан Иманқұлов күдікке ілінген.
Қазір сот оның психикалық жағдайына қатысты сараптамалық қорытындылар мен іс материалдарын қарауы тиіс.
Медициналық сипаттағы мәжбүрлеу шараларын қолдану мәселесінің сотта қаралуы күдіктінің кінәсі немесе есі дұрыс еместігі түпкілікті анықталды дегенді білдірмейді. Тиісті шешімді сот дәлелдемелер мен сараптама қорытындыларын зерттегеннен кейін қабылдайды.
