Қазақстан ғылымы тағы бір көрнекті тұлғасынан айырылды. Танымал микробиолог-ғалым, профессор, Дінмұхамед Қонаевтың туған қарындасы Рауза Қонаева 91 жасқа қараған шағында өмірден өтті, деп хабарлайды kznews.kz.
Қаралы хабарды Мәжіліс депутаты Бақытжан Базарбек мәлімдеді. Ол марқұмның адами болмысы мен ұстаздық келбетін ерекше ілтипатпен еске алды.
«Рауза Қонаева әрдайым адаммен ашық, тура сөйлесетін жан еді. Айтар ойын таразылап, тыңдаушысына шын мәнінде қажет сөзді таба білетін. Жүзінен жылылық кетпейтін, өз ішіндегі уайымын ешқашан білдірмейтін», – деп жазды депутат.
Рауза Қонаева 1934 жылы Алматы облысының Шілік ауылында дүниеге келген. 1952 жылы М.В.Ломоносов атындағы Мәскеу мемлекеттік университетінің биология және топырақтану факультетіне оқуға қабылданып, 1956 жылы оны үздік аяқтады.
Сол жылдан бастап 2016 жылға дейін Қазақстанның Ғылым академиясында табан аудармай еңбек етіп, отандық ғылымның өркендеуіне елеулі үлес қосты.
