«Қайрат» футбол клубының шабуылшысы Дастан Сәтпаев «Дарын» мемлекеттік жастар сыйлығының иегері атанды. , деп хабарлайды kznews.kz.
Биыл сыйлыққа 300-ден аса үміткер ұсынылып, олардың 294-і комиссия қарауына түсті.
Нәтижесінде жеңімпаздар «Ғылым» – 64, «Дизайн және бейнелеу өнері» – 19, «Спорт» – 27, «Театр және кино» – 41, «Эстрада» – 13, «Журналистика» – 16, «Халық шығармашылығы» – 41, «Қоғамдық қызмет» – 31, «Әдебиет» – 15 және «Классикалық музыка» – 27 номинациясы бойынша анықталды.
Комиссия құрамында депутаттар, қоғам қайраткерлері, мәдениет, медиа және спорт өкілдерінен құралған 37 мүше жұмыс істеді.
«Дарын» мемлекеттік жастар сыйлығын табыстау рәсімі 25 қарашада өтеді. Лауреаттарға диплом, төсбелгі және ақшалай сыйақы беріледі.
Айта кетейік, Дастан Сәтпаев – «Қайрат» және Қазақстан құрамасының шабуылшысы. 2024 жылы «Қайрат-Жастарда» ойнады. 2025 жылдың қаңтарында «Челсимен» 2029 жылға дейін келісімшартқа қол қойып, 4,3 млн еуроға трансферленді. Клуб сапына 2026 жылдан бастап қосылады.
