Бүгін, 13:50
Дана Медеуова жаңа топтың жұмысын бастағанын Астанада өткен Орталық Азия елдерінің бала құқықтары жөніндегі уәкілдерінің екінші халықаралық форумында мәлімдеді.
Құрылтайда балалардың құқығын қорғаумен айналысатын "Қазақстан балалары" атты депутаттық топ құрылды. Оған депутат Дана Медеуова жетекшілік етеді, деп хабарлайды kznews.kz
"Бүгін Құрылтайдың “Қазақстан балалары” депутаттық тобы жұмысын бастайды. Біз заң шығару жұмысында балалардың құқықтары, қауіпсіздігі, денсаулығы мен әл-ауқаты басты назарда болғанын қалаймыз", – деді депутат.
Жаңа топ балалардың құқығын қорғауға, олардың қауіпсіздігі мен денсаулығына қатысты заңдарды жетілдіруге күш салмақ. Алайда топтың құрамына қанша депутат кіргені және алдағы уақытта нақты қандай заңдарға өзгеріс енгізілетіні әзірге белгісіз.
Ал форумда негізінен балалардың интернеттегі қауіпсіздігі сөз болды. Жиынға қатысушылар ғаламтор мен жаңа технологиялардың балалардың дамуына әсерін, оларды желідегі қауіп-қатерден қорғау жолдарын талқылады.
Сондай-ақ мүгедектігі бар балалардың да өзгелермен тең дәрежеде білім алуына жағдай жасау мәселесі көтерілді.
