Бүгін, 15:10
Бұрынғы ұлттық экономика министрі Қуандық Бишімбаевтың экс-жұбайы Назым Қаһарман өмірбаяндық кітабын шығаруға дайындалып жатыр, деп хабарлайды kznews.kz.
Назым Қаһарманның айтуынша, кітап қазір баспаның қарауында. Туындының тұсаукесері биыл күзде өтуі мүмкін.
Автор еңбектің автофикшн жанрында жазылғанын атап өтті. Яғни шығарма нақты өмірде болған оқиғаларға негізделгенімен, онда көркем әдебиетке тән баяндау тәсілдері де қолданылған.
Қаһарман кітапта бұрынғы жұбайының жеке өміріне қатысты кейбір мәліметтерді де қамтығанын айтты. Оның сөзінше, туындыда Бишімбаевпен қарым-қатынаста болған әйелдер туралы айтылады. Алайда олардың жеке деректері жарияланбай, тек есімдері ғана көрсетіледі.
Сонымен қатар Назым Қаһарман кітаптағы мәліметтерге байланысты қандай да бір талап-арыз түссе, өз ұстанымын дәлелдеуге дайын екенін жеткізді. Оның айтуынша, қолында бұрынғы күйеуіне қатысты хат-хабарлар мен басқа да дәлелдер сақталған.
