Бүгін, 08:57
Танымал актер Жүсіп Ақшора отандық телеарналардың біріне берген сұхбатында осы уақытқа дейін мемлекеттік марапатқа ие болмауына қатысты ойын ортаға салды, деп хабарлайды kznews.kz.
Өнер иесінің сөзінше, ол үшін атақ-даңқ пен түрлі марапаттардың маңызы аса жоғары емес.
«Бұл мен үшін маңызды мәселе емес. Біреудің маған атақ бергені қажет емес. Тіпті “Халық әртісі” атағының өзі керек деп ойламаймын. Егер халық танып, құрмет көрсетіп, амандасып жатса — соның өзі үлкен мәртебе. Меніңше, нағыз халық әртісі дегеніміз — осы», — деді актер.
Еске салсақ, бұған дейін Президент Қасым-Жомарт Тоқаев мәдениет пен өнер саласының бірқатар өкілдерін мемлекеттік наградалармен марапаттаған болатын. Солардың қатарында әнші Дастан Оразбеков те бар.
Осыдан кейін әлеуметтік желі қолданушылары «Шаншар» әзіл-сықақ театрының актерлері Уәлибек Әбдірайымов пен Жүсіп Ақшораның әлі күнге дейін мемлекеттік марапат алмағанын қызу талқылап, пікірлерін білдірген еді.
