Бүгін, 18:12
Атырауда 42 жастағы төрт баланың анасы өз үйінде пышақ жарақатынан көз жұмды. Қылмысқа марқұмның азаматтық некедегі жұбайы күдікті деп танылды. Оқиғаға олардың үш жасар қызы куә болған, деп хабарлайды КТК телеарнасы.
Қайғылы жағдай көпқабатты үйдегі пәтерлердің бірінде болған. Телеарна мәліметінше, әйелге бірнеше рет пышақ жарақаты салынған. Оқиғадан кейін күдікті пәтерден кетіп қалған.
Үш жасар бүлдіршін анасының денесінің жанында бір тәулікке жуық жалғыз қалған. Оларды кешке үйге оралған марқұмның 16 жастағы қызы тапқан.
Марқұмның анасы Фатима Шымырованың айтуынша, кішкентай қыз болған жағдайды туыстары мен полиция қызметкерлеріне айтып берген.
"Ол әкесінің анасына пышақ салғанын, анасының айқайлағанын және өзі жылаған кезде ер адамның қашып кеткенін айтты", – деді марқұмның анасы.
Қаза тапқан Алмагүл Шмирова төрт қыз тәрбиелеген. Үлкен екі қызы тұрмыста, ал 16 жастағы және үш жасар қыздары өзімен бірге тұрған. Әйел шағын дүкенде жұмыс істеген.
Туыстарының сөзінше, Алмагүл күдіктімен шамамен алты жыл бірге тұрған. Олардың айтуынша, отбасында бұған дейін де жанжалдар болған және әйел бірнеше рет полиция шақырған.
Марқұмның жақындары оның денесінен көптеген пышақ жарақаты табылғанын мәлімдеді. Олар істің жан-жақты тергеліп, кінәлі адамның заң аясында қатаң жазалануын талап етіп отыр.
Туыстарының айтуынша, 38 жастағы күдікті оқиғадан төрт күн өткен соң Атырау қаласында ұсталған. Полиция оның қамауға алынғанын және қылмыстық іс бойынша тергеу жүріп жатқанын растады.
Қайғылы жағдайға куә болған үш жасар бүлдіршін мен марқұмның 16 жастағы қызына психологиялық көмек көрсету жоспарланған. Қазіргі уақытта оқиғаның барлық мән-жайы анықталып жатыр.
