Бүгін, 13:10
Ішкі істер министрінің орынбасары Санжар Әділов Атырау облысында отбасының жоғалуына қатысы бар күдіктілердің ұсталуына қатьысты мәлімдеме жасады, деп хабарлайды kznews.kz.
Әділовтің айтуынша, Атырау облысында отбасының жоғалуына байланысты іс бойынша күдіктілер Индонезияда ұсталған.
«Қазақстандық полицейлер Интерпол және Индонезия полициясымен бірлесіп ауқымды жұмыс жүргізді. Қазіргі уақытта күдіктілер Индонезияда ұсталды. Жақын арада олар Қазақстанға жеткізіледі. Оларды елге экстрадициялау және жеткізу мәселесі қазір шешіліп жатыр», — деді Әділов.
Айта кетейік, ерлі-зайыптылар іс бойынша күдікті болып есептеледі.
Із-түзсіз жоғалған екі адамды іздеу жұмыстары жалғасуда. Атырау облысында арнайы тергеу жедел тобы жұмыс істеп жатыр.
Отбасы туралы не белгілі
66 жастағы Мақсот Қарабалин мен 64 жастағы Нәсіп Өтешқалиева Атырау облысының Жангелдин ауылында тұрған. Туыстарының айтуынша, ерлі-зайыптылар үшінші топтағы мүгедек болған, мал шаруашылығымен айналысқан және туған ауылынан сирек шығатын. Олардың үш баласы бар – екі қызы және бір ұлы.
2025 жылғы 25 желтоқсанда өңірлік полицияға туыстары отбасының жоғалғаны туралы хабарлаған. Құқық қорғау органдарының мәліметінше, жергілікті тұрғын әйел ағасы, оның жұбайы және екі ересек баласы – 32 жастағы ұлы Наурыз бен 35 жастағы қызы Мирамгүлдің қараша айынан бері байланысқа шықпағанын айтқан.
Анықталғандай, отбасы үйден белгісіз бағытта шығып кеткен, содан бері олардың қайда екені белгісіз болған.
Іздеуде төрт ересек адам болған :
отағасы;
оның жұбайы;
32 жастағы ұлы;
35 жастағы қызы.
Жоғалған ерлі-зайыптылардың мәйіттері табылды
6 қаңтарда полицейлер зейнеткер ерлі-зайыптылардың мәйіттерін тапты. Осыдан кейін құқық қорғау органдары қылмыстық іс қозғады.
Әлеуметтік желілерде ерлі-зайыптылардың денелері өз үйлерінің ауласындағы қораның еденінің астынан табылғаны туралы ақпарат тарады. Алайда құқық қорғау органдары бұл ақпаратқа ресми түсініктеме берген жоқ.
Айта кетейік, кеше ата-енесін өлтірді деп айыпталған ер адам мен әйелі Индонезияда ұсталды.
