Бүгін, 12:44
Астанада кәріз жүйесінен табылған жаңа туған сәбиге қатысты 29 жастағы әйел ұсталды, деп хабарлайды kznews.kz.
Бұл туралы Астана қаласының Полиция департаменті мәлімдеді. Ведомствоның дерегінше, аталған оқиға бойынша 29 жастағы әйел анықталып, ұсталған. Қазіргі уақытта сотқа дейінгі тергеу амалдары жүргізіліп жатыр.
Бұған дейін әлеуметтік желілерде елордадағы қонақүйлердің бірінде әйелдің босанып, жаңа туған нәрестені кәріз құдығына тастап кеткені туралы ақпарат тараған болатын. Алдын ала мәлімет бойынша, әйел жүктіліктің алтыншы айында мерзімінен бұрын босанған.
Оқиғадан кейін қонақүй орналасқан тұрғын үй кешенінің тұрғындары да шағымдарын айтты. Олардың сөзінше, аталған нысаннан түнгі уақытта айқай-шу жиі естіліп, полиция бірнеше рет шақырылғанымен, мәселе түбегейлі шешілмеген.
Полиция мәліметінше, 2026 жылдың басынан бері осы қонақүй бойынша «102» қызметіне барлығы 19 шақырту түскен. Нәтижесінде тыныштықты бұзғаны үшін 13 адам, ал қоғамдық тәртіпті бұзғаны үшін тағы 3 адам әкімшілік жауапкершілікке тартылған.
Сонымен қатар қонақүй иесіне құқық бұзушылықтардың алдын алу және оларды туындататын себептерді жою жөнінде ресми ұсыным берілген. Құқық қорғау органдарының айтуынша, бұл аумақ учаскелік инспекторлардың тұрақты бақылауында.
