Бүгін, 10:11
Астанада BI Group компаниясы тұрғызған Garden View тұрғын үй кешенінде қауіпті жағдай тіркелді. Көпқабатты үйдегі терезе әйнегі сынып, оның бөлшектері тұрғындар жүретін аумаққа шашылған, деп хабарлайды kznews.kz.
Оқиға сәті видеоға түсіп қалған. Кадрлардан әйнек сынықтарының ғимараттың төменгі бөлігіне құлағанын көруге болады. Абырой болғанда, сол уақытта маңда жүрген адамдардың ешқайсысы зардап шекпеген.
Оқиғадан кейін қауіпті аумақ қоршауға алынып, жерге түскен әйнек қалдықтары тазартылған. Ал ғимаратта әлі де қауіп төндіруі мүмкін әйнек бөлшектерін алып тастау үшін мамандар арнайы техникамен жұмыс жүргізген.
BI Group өкілдерінің мәліметінше, биіктіктегі элементтерді қауіпсіз бөлшектеу үшін тиісті қызметкерлер тартылған. Қазір әйнектің қандай себеппен сынғаны анықталып жатыр.
Компания бұл жағдай бойынша тексеру жүргізілетінін және оның нәтижесі тұрғындарға хабарланатынын мәлімдеді.
Garden View тұрғын үй кешені бизнес-класс санатына жататынын ескерсек, мұндай оқиға тұрғындар қауіпсіздігі мен ғимараттың пайдалану сапасына қатысты сұрақ туғызбай қоймайды. Әсіресе әйнек сынықтарының адамдар жүретін аумаққа құлауы қауіпті жағдайдың алдын алу мәселесін қайта көтерді.
