Ақтөбеде ауыр қылмыс тіркелді. Ер адам өз әйелін өлтіріп, кейін өзі де өмірін қиюға барғаны анықталды, деп хабарлайды kznews.kz.
Бұған дейін әлеуметтік желілерде ерлі-зайыптының хабарсыз кеткені туралы ақпарат тараған еді. Арада көп өтпей олардың мәйіті табылғаны белгілі болды. Облыстық полицияның мәліметінше, қала шетінен зорлық-зомбылықтың айқын белгілері бар 39 жастағы әйелдің денесі табылған.
«Одан кейінгі іздестіру іс-шаралары барысында әйелінің күйеуінің денесі асылып тұрған күйінде анықталды», — деп хабарлады полиция департаменті.
Алдын ала деректерге қарағанда, ер адам алдымен әйелін өлтіріп, содан соң өзіне қол салған. Желіде тараған мәліметтер бойынша, марқұмдардың артында бес баласы қалғаны айтылуда.
