Бүгін, 19:10
2016 жылы Чингис Заруов Испанияның Ласарте-Ория қаласында аспаз ретінде тағылымдамадан өтті. Сол кезде Баск кулинарлық орталығындағы ашық есік күнінде оқу орнының фонында селфи жасап, «Мүмкін бұл менің болашағым шығар?» деп жазған еді. Ол кезде бұл жай ғана арман сияқты көрінген. Алайда арада тоғыз жыл өткенде сол арман шындыққа айналды: қазақстандық жігіт осы беделді гастрономиялық университеттің магистратурасын үздік тәмамдап, қазір Michelin жұлдызы бар мейрамханада аға аспаз болып еңбек етіп жүр, деп хабарлайды kznews.kz Digital Business-ке сілтеме жасап.
Digital Business басылымына берген сұхбатында ол өзінің кәсіби жолы туралы, ас үйдегі алғашқы қадамдарынан бастап Испаниядағы жұмысына дейін кеңінен айтып берген. Сондай-ақ жоғары деңгейлі мейрамханаларға қалай жұмысқа орналасуға болатынын, әлемдік жұлдыздарға ас әзірлеу тәжірибесін және өзіне тән аспаздық стилін қалай қалыптастырғанын бөлісті.
Оның аспаздыққа деген қызығушылығы бала кезінен басталған. Чингис Түрікменстанда дүниеге келгенімен, бес жасынан бастап Ақтауда өскен. Мектепті бітіргеннен кейін үйде жиі ас әзірлеуге көмектесіп, көкөніс тазалап, қамыр илеп, манты түйген. Отбасында кәсіби аспаздар болмаса да, тамақ дайындау ол үшін жылулық пен қамқорлықпен байланысты маңызды іске айналған.
9-сыныптан кейін ол Маңғыстау туризм колледжіне «қоғамдық тамақтандыру технологы» мамандығына оқуға түсті. Оқу барысында салалық әдебиеттерді көп оқып, аспаздық бағдарламаларды белсенді түрде көре бастады. Әсіресе атақты шеф-аспаз Джейми Оливердің бағдарламалары оған ерекше әсер етіп, Лондонға мастер-классқа баруына түрткі болған. Бұл сапардың шығынын ол стипендиясын жинап, өзі төлеген.
2016 жылы колледжді тәмамдаған соң, Чингис тек жоғары деңгейлі мейрамханаларда жұмыс істеуді мақсат етті. Тағылымдаманы табуға білім беру агенттігі көмектесіп, ол үш Michelin жұлдызына ие Martín Berasategui мейрамханасына қабылданды. Сол жерде қарқынды тәжірибеден өтіп, жоғары асүйдің стандарттарын меңгеріп, кәсіби командамен жұмыс істеудің құнды тәжірибесін жинақтады.
Дәл осы кезеңде ол алғаш рет Баск кулинарлық орталығына барып, кейін нақты мақсатқа айналған ой пайда болды.
2017 жылы ол мансабын Сан-Себастьян қаласындағы Zelai Txiki мейрамханасында жалғастырды. Дәстүрлі баск асханасына негізделген бұл отбасылық мекеме оған жаңа тәжірибе сыйлады: мұнда ол жан-жақтылықты меңгеріп, жоғары асүйдің қатаң тәртіп, дәлдік және толық берілуді талап ететінін түсінді.
Осы мейрамханада жұмыс істей жүріп, ол Хавьер Бардем, Пенелопа Крус және Джонни Депп сияқты әлемге танымал тұлғаларға ас әзірлеу мүмкіндігіне ие болды. Олар қалаға кинофестиваль кезінде жиі келетін.
2024 жылы Чингис Баск кулинарлық орталығының магистратурасына оқуға түсті. Оқу бағдарламасы теория мен тәжірибені қатар қамтып, тағылымдаманы белгілі шеф-аспаз Хесус Санчестің жетекшілігімен Cenador de Amós мейрамханасында өтті. Сол жерде ол білімін тереңдетіп, асүйдегі кәсіби ұстанымын толық қалыптастырды: мұнда креатив қана емес, нәтижесінің тұрақтылығы да маңызды.
Оқуын аяқтағаннан кейін ол қайтадан Zelai Txiki мейрамханасына оралып, кәсіби дамуын жалғастырып келеді. Оның айтуынша, Испаниядағы гастрономия саласы жоғары стандарттарымен және қызмет көрсету деңгейімен ерекшеленеді, ал табысқа жету тек талантқа емес, жүйелі еңбекке де байланысты.
Чингис өзінің аспаздық стилін минимализм мен өніммен дәл жұмыс істеу деп сипаттайды. Әр тағамның негізінде басты ингредиенттің табиғи дәмі тұрады, ал соустар мен текстуралар оны толықтырып, тереңдете түседі.
Қаншалықты тығыз жұмыс кестесіне қарамастан, ол отбасымен байланысын үзбей, жылына бір рет елге келіп тұрады. Ал ең жоғары бағасын әлі күнге дейін әжесінің асханасына береді, оның пікірінше, ол тағамдардың орны бөлек әрі теңдессіз.
