Бүгін, 00:48
Ақмола облысында әйелді зорлап, өлтірген ер адам 22 жылға бас бостандығынан айырылады, деп хабарлайды kznews.kz.
Ақмола облысының қылмыстық істер жөніндегі мамандандырылған ауданаралық соты 61 жастағы И.-ге қатысты қылмыстық істі қарады. Ол әйелді аса қатыгездікпен зорлап, өлтіргені үшін кінәлі деп танылды.
Оқиға 2002 жылы Ақкөл қаласында болған. Тергеу мәліметінше, сол кезде 37 жаста болған айыпталушы мас күйде үйіне жету үшін көлік тоқтатпақ болған 29 жастағы әйелмен кездескен.
Соттың мәліметіне сәйкес, ер адам әйелді ұрып-соғып, өлтіремін деп қорқытып, оны жергілікті стадион аумағына алып барған. Сол жерде жәбірленушіні ұрып, денесін темекімен күйдіріп, зорлаған. Кейін қылмысын жасыру және жазадан құтылу мақсатында оны өлтірген.
«Адам өлтіруді ол аса қатыгездікпен жасаған, жәбірленушінің аузына шырша бүршіктері мен топырақ тығып, кейін мәйітті даладағы дәретханаға тастап, оқиға орнынан қашып кеткен. Сараптама қорытындысына сәйкес, А.-ның өлімі тыныс алу жолдарының бітелуі салдарынан болған асфиксиядан туындаған», – делінген соттың баспасөз қызметі таратқан хабарламада.
Айыпталушының кінәсі куәгерлердің айғақтарымен, фотосурет арқылы танумен, оқиға орнын тексеру нәтижелерімен және сараптамалар қорытындысымен дәлелденген. Сондай-ақ сот оның бұған дейін бірнеше рет сотталғанын және аса ауыр қылмыс жасағанын ескерген.
Сот үкімімен:
– 22 жылға бас бостандығынан айыру;
– жәбірленушінің отбасына 10 миллион теңге моральдық өтемақы төлеу;
– жазасын өтеу барысында алкогольге байланысты психикалық және мінез-құлық бұзылыстарынан мәжбүрлі ем қабылдау тағайындалды.
Сот үкімі заңды күшіне әлі енген жоқ.
