Бүгін, 09:49
Алматыдағы №294 сайлау учаскесіне әлемге әйгілі футболшылардың бейнесіндегі екі ерекше сайлаушы келіп, көпшіліктің назарын аударды, деп хабарлайды kznews.kz.
Олар – футболға әуес екі дос. Танымал спортшыларға деген сүйіспеншілігін ерекше түрде көрсеткен азаматтар Лионель Месси мен Криштиану Роналдудың образын таңдап, сайлау учаскесіне осы кейіпте келген.
Екі жігіт дауыс беруге кірмес бұрын №70 мектептің алдында шағын футбол жаттығуын да жасап үлгерген. Олар доппен бірнеше жаттығу орындап, сайлау күнінің таңын спортпен бастаған.
Ерекше киінген «Месси» мен «Роналдо» учаскедегі өзге азаматтардың да қызығушылығын оятқан. Олар суретке түсіп, сайлаушыларға көтеріңкі көңіл-күй сыйлаған.
Ресми мәлімет бойынша, достар бұл әрекеті арқылы өздерінің футболға деген қызығушылығын көрсетіп қана қоймай, азаматтық белсенділікке де назар аударуды мақсат еткен.
Осылайша Алматыдағы Құрылтай сайлауының алғашқы сағаттарында ерекше образымен есте қалған қос сайлаушы әлеуметтік желіде қызу талқыланған кадрлардың біріне айналды.
