6 желтоқсан, 2018
2018 жылғы 5 желтоқсан 19:59 281
ТАЛДЫҚОРҒАН.ҚазАқпарат - Алматы облысының полицейлері ірі көлік базарының бірінде көлік сатуға келген адамды өлтіріп, көлігін алып кеткен күдіктіні ұстады, деп хабарлайды ҚазАқпарат тілшісі.
Алматы облыстық Полиция департаменті баспасөз қызметінің хабарлауынша, күдікті «Тойота» маркалы көлігін сатуға келген 26 жасар азаматты «ақшаны үйде беремін» деген желеумен алдап, көлікке нотариалды құжат жасатқан. Артынша көлік иесін өлтіріп, мәйітін жол-жөнекей көміп кеткен.
«Түркістан облысының тұрғынын өлтіріп, көлігін алып кеткен күдікті бұған дейін де сотталған. Қазір 36 жастағы облыс тұрғыны ұсталып, қамауға алынды. Қазіргі таңда ҚР Қылмыстық кодексінің 99-бабына сәйкес сотқа дейінгі тергеу амалдары жүргізілуде. Бұл іс облыстық тергеу басқармасының өндірісінде», - деп атап өтті облыстық полиция өкілдері.
Айта кетейік, қолды болған көлік күдіктінің үйінен табылып, тәркіленді және іс материалдарына айғақзат ретінде тіркелді.
