Бүгін, 22:13
Экономист әрі қоғам белсендісі Айбар Олжаев зейнетақы жинағы бойынша жеткіліктілік шегінің көтерілуіне қатысты пікір білдірді, деп хабарлайды kznews.kz. Оның айтуынша, бұл шешім азаматтардың болашақтағы қаржылық тұрақтылығын сақтау үшін қабылданған маңызды қадам.
Айбар Олжаев әлеуметтік желідегі парақшасында пандемия кезінде халыққа қолдау ретінде енгізілген зейнетақы жинағын мерзімінен бұрын пайдалану мүмкіндігі уақытша шара болғанын атап өтті. Оның пікірінше, соңғы жылдары азаматтар болашаққа арналған жинақты қазіргі қажеттілікке жиі жұмсай бастаған.
«Зейнетақы жинағы – қазіргі шығындарға арналған қарапайым банктік шот емес. Бұл адамның ертеңгі қарттығына арналған қаржылық қоры», – деді ол.
Сарапшының сөзінше, жеткіліктілік шегі азаматтардың ақшасына қойылған шектеу емес, керісінше олардың болашақтағы табысын қорғауға арналған механизм. Мемлекет бұл арқылы қаражатты тартып алмайды, тек азаматтардың болашақта жеткілікті зейнетақымен қамтамасыз етілуіне жағдай жасайды.
Сонымен қатар ол жаңа әдістеменің зейнетақы жинағының жеткіліктілігін бұрынғыдан нақтырақ есептеуге мүмкіндік беретінін айтты. Есептеу барысында адамның өмір сүру ұзақтығы, еңбек өтілі, жарналардың тұрақтылығы, инвестициялық табыстың ықтималдығы және зейнет жасындағы қажетті табыс көлемі ескеріледі.
Айбар Олжаев бұл мәселенің әсіресе жастар үшін маңызды екенін атап өтті. Себебі болашақта қазақстандықтардың зейнетақысының негізгі бөлігі өздерінің жинағына тәуелді болады.
«Егер бүгін барлық жинақты жұмсап қойсақ, ертең мемлекетке немесе балаларға тәуелді болу қаупі артады. Ал жеткілікті қаражат сақталса, адам зейнет жасында да қаржылық тәуелсіздігін жоғалтпайды», – деді ол.
Экономистің пікірінше, жеткіліктілік шегінің көтерілуі «ақшаны тартып алу» емес, азаматтардың өз болашағына жасалған инвестициясы ретінде қарастырылуы тиіс.
