Қарағанды облысының Абай қаласындағы №1 мектепте 17 жыл бойы аула сыпырушы болып еңбек еткен азаматты әріптестері ерекше құрметпен зейнеткерлікке шығарып салды деп хабарлайды kznews.kz.
Мектеп ұжымы үшін бұл күн жай ғана әріптесімен қоштасу емес, жылдар бойы маңдай терімен еңбек еткен жанға ризашылық білдірудің ерекше сәтіне айналды. Ұжым оның еңбегін бағалап, зейнет жасына шығуын жылы лебізбен атап өткен.
Аталған оқиға әлеуметтік желіде де көпшіліктің назарын аударды. Азаматтың жиені мектеп ұжымының бұл әрекетіне ризашылығын білдіріп, қарапайым еңбек адамын құрметтеудің маңызына тоқталды.
«Ақша мен мансап алдыңғы орынға шыққан заманда қарапайым еңбек адамына осындай құрмет көрсету – үлкен өнеге. Мектеп ұжымы адамдық қасиетті, сыйластық пен еңбекті бағалауды бәрінен жоғары қоятынын көрсетті», – деп жазды ол.