Павлодарда заңсыз көмір сататын 10 шақты орын анықталды

Облыс орталығында рұқсатсыз кәсіпкерлікпен айналысқан және белгіленбеген орында көмір сатқандарға ескерту жасалуда, деп хабарлайды pavlodarnews.kz тілшісі.

Қала әкімінің орынбасары Аян Бейсекин көмір бағасын тұрақтандыру үшін арнайы топ жұмыс жасап жатқанын атап өтті.

— Көмірді заңсыз сатушыларды анықтау бойынша арнайы топ жұмыс жасауда, — деді Аян Бейсекин.

– Заңсыз кәсіпкерлікпен айналысушылар рұқсат етілмеген жерлерде сатумен қатар, бағаларды қымбаттатуда. Қазіргі уақытта арнайы топ қаланы аралауда. Топта қоғамдық ұйымдар, жауапты мемлекеттік органдардың өкілдері бар. Топтың негізгі тапсырмасы – заң нормаларын түсіндіру. Жергілікті полиция қызметі және мемлекеттік кіріс органдары әкімшілік айыппұл салуға құқығы бар.

Жалпы, қаламызға көмір тұрақты жеткізілуде. Жағдай бақылауда. Көмір сатумен айналысатын арнайы рұқсаты бар «Элит KZ» ЖШС директоры Дастан Даулетбаев сатып алушылардың азайғанын айтады.

— Базамызда көмір қоры жеткілікті, — деді Дастан Дәлетбаев.

– Майкөбенің тоннасы — 12 мың теңге, қарағандылық Шұбаркөл – 17 мың теңге болса, Қаражыра – 13 мың теңгеден. Қыркүйек пен қазан айында келушілер көбейеді. Бүгінде ұзын-сонар кезек жоқ. Қазіргі уақытта күніне 20-30 машина келеді. Былтыр осы уақыттарда күніне 60-70 машина келетін. Не себепті азайып қалғанын білмейміз.

Арнайы топтың бүгінгі жұмысы бойынша Суворов көшесінде рұқсатсыз көмір сататын 3 көлік анықталды. — Рейдтік шара барысында Суворов көшесінде рұқсатсыз көмір сатып тұрған 3 көлік анықталды, — деді Павлодар қаласы ІІБ жергілікті полиция қызметі басшысының орынбасары, полиция майоры Мұрат Козкин.

– Мұндай жағдай ҚР Әкімшілік кодексінің 204-бабы бойынша рұқсат етілмеген жерде сауда жасау болып қарастырылады.

Бірінші ретке ескерту бердік. Екінші рет ұсталған жағдайда 10 АЕК көлемінде айыппұл салынады.

Telegram арнасындағы маңызды жаңалықтар «zakon.kz». Жазылу!