Михал Билек: Зайнутдиновті Карпин жібергісі келмеді

Қазақстан құрамасының бас бапкері Михал Билек алғашқы баспасөз мәслихатын өткізді, деп хабарлайды Prosports.kz сайты.

— Қазақстан құрамасын баптағаныма қуаныштымын. Бір жағынан, мақтан тұтамын. Оқу жаттығу жиынына уақыт бөлгені жақсы болды. Түркияға ертең аттанамыз. 

— Қазақстан құрамасынан шақырту алғаннан соң ұзақ ойландыңыз ба?

— Шынымды айтсам, жоқ. Үш апта бойы Қазақстан тарапымен келіссөз жүргіздік. Тек Чехиядағы бір командамен келісімім қиындық туғызды. Алайда біз бір-бірімізге түсіністікпен қарадық.

— Ұлттық құрамаға футболшыларды қалай іріктедіңіздер?

— Барлық футболшылар жайлы ақпарат қажет, оның үстіне оларды іс жүзінде көргім келді.

— Келісімшартыңыз қай жылға дейін жарамды? 

— Тек бір жылға келісімшартқа отырдық.

— Қазақстанға келмей тұрып, біздің ел жайлы не ойладыңыз?

— «Славияның» Еуропа лигасында «Астанаға» қарсы ойнағаны есімде. Мирослав Беранекпен таныстығым бар.

— ЕУРО-2020 іріктеу кезеңіне қандай мақсат қойылды?

— Дәл қазір бұл сұраққа жауап табу қиын. Маған және ойыншыларға танысу үшін уақыт қажет. Қолымыздан келгенін жасап, бұрынғыға қарағанда жақсы нәтиже көрсетуге тырысамыз дегім келеді.

— Ұлттық құрамаға Постников пен Зайнутдинов шақырту алмады? 

— Постников жарақаттанып қалды. Зайнутдиновті шақырғымыз келген. Алайда оны Валерий Карпин («Ростовтың» бас бапкері) жібергісі келмеді.