Азаматтық форум ашылды | «Айқын» газеті

Астанадағы Тәуелсіздік сарайында VIII Азаматтық форум өз жұмысын бастады. Құрылтайға «Азаматтық қоғам және мемлекет: Диалог. Әріптестік. Сенім» тақырыбы арқау болды.

Бұл іс-шараның мақсаты – азаматтық сектордың, мемлекеттік органдардың, биз­нес-құрылымдардың, халықаралық ұйым­дардың және сарапшылар қауым­дасты­ғы­ның ашық диалогын дамыту.
Форум қатысушыларына қайырыл­ған Президент Әкімшілігінің ішкі саясат бө­лімінің меңгерушісі Аида Балаева азаматтық қоғамның құндылықтарына тоқталды.
«Біздің барлығымыздың құндылығымыз ортақ, бұл – тұрақтылық, бейбітшілік, мемлекетіміздің тыныштығы және азамат­та­­­рымыздың әл-ауқаты. Бұл басты құнды­лықтар бізді біріктіреді. Әрбіріміздің жұ­мыс бөлігімізде ел тәуелсіздігін нығайту, қазақстандықтардың жайлы өмірін жақ­сарта түсу үшін қолдан келгеннің барлығын жасауымыз керек. Біздің мақсатымыз бен мұратымыз да бір, бұл – қуатты Қазақстанды тұрғызу», – деді ол.
Аида Балаева жігерлі қоғам белсен­ділеріне, пәрменді үкіметтік емес ұйымдарға еліміздің өткір әлеуметтік проблемаларын шешуде мемлекетке жан-жақты қолдау көрсетіп, ізгі жұмыс істеп келе жат­қандары үшін алғыс білдірді.
«Бәлкім, азаматтық сектор идеялары­ның барлығы бірдей іске жарамаған, жүзеге асы­рылмаған шығар. Бірақ бүгінгі форум бір­лес­кен жұмысымызға қуатты серпін береді деп үміттенемін» – деген ол форум осы жұ­мыс­­­­­ты жетілдіруге жол ашарына сенім білдірді.
Ашылу салтанатында қоғамдық даму министрі Дархан Кәлетаев сөз сөйледі.
– Азаматтық форум екі жылда бір рет өткізіледі, бірақ бұл форумға 2005 жылдан бері Мемлекет басшысы қатыспаған бола­тын. Бұл жолы Президент қатысуға ниет біл­діріп отыр: ертең біз Елбасымен сұх­бат­та­суға мүмкіндік аламыз. Форум бүгінде үл­кен принципті мән-маңызға ие болды – біз алдағы уақытта азаматтық сектордың қа­лай дамитынын талқыға саламыз», – деді министр.
Ол ел Үкіметі азаматтық қоғамның да­муына үлкен мән беріп отырғанын атап өтті.
«Үкімет бұл бағытта үлкен жұмыс жүргізуде. Біз үшін азаматтық қоғамнан келіп түсетін ұсыныстар өте маңызды. Менің ойымша, форум аясындағы екі күн тек елдің азаматтық қоғамын біріктіріп қоймай, сонымен бірге қатысушыларға біздің бәріміз бірлесіп іске асыруға тиіс ұсынымдарды түзуге де мүмкіндік бермек. Бұл, сайып келгенде, барша еліміз, сондай-ақ халқымыз күтіп отырған реформаларға бастайды», – деді Д.Кәлетаев.
VIII Азаматтық форум аясында ­се­ми­нарлар, шеберлік сабақтары, дөң­гелек үстел­дер, пікірталас алаңдары, мүд­делі ведом­стволар басшыларымен салалық кезде­сулер түріндегі 35 тақырыптық сес­сия­лар жоспарланған. Форумда «Адамдар» (People)», «Планета» (Planet), «Өркендеу» (Prosperity), «Әлем» (Peace), «Серіктестік» (Partnership) атауымен 5 панельдік сес­сия өтеді, аталған сессиялар БҰҰ-ның тұрақты даму мақсаттарының құрамына кіретін тиісті мақсатты топтарды қамтиды.
Сонымен қатар форум аясында 2020-2025 жылдарға арналған азаматтық қоғамды дамыту тұжырымдамасы талқы­ланатыны мәлім болды.
Жиын бүгін де жалғасын тауып, күн тәртібіне сәйкес, негізгі пленарлық оты­рысқа ұласпақ.
Форум үкіметтік емес ұйымдарды марапаттау рәсімімен аяқталады.

Ерік Ерденов