Шымкентте балабақшада төрт бала мен тәрбиеші уланып қалды

Шымкент балалар бақшасындағы оқыс оқиғаға газ жабдығының дұрыс жұмыс істемеуі себеп болуы мүмкін. Мамандар көптеген заң бұзушылықты анықтады

НҰР-СҰЛТАН, 5 ақпан – Sputnik. Шымкенттегі жеке балабақшалардың бірінде төрт бір жасар бала мен жас тәрбиеші газға уланып қалды, деп хабарлады Otyrar.kz.

Оқиға сейсенбі, 4 ақпан күні «Қазығұрт» шағын ауданында болған.
Көмірқышқыл газымен уланған 2018 жылы туған төрт бала мен 1993 жылы туған тәрбиеші ауруханаға түсті.

Мамандардың  алдын ала қорытындысы бойынша оқиғаға табиғи газбен жұмыс істейтін газ колонкасының дұрыс жұмыс істемеуі себеп болған.

Балабақша ғимараты 2018 жылы пайдалануға берілгені хабарланды. Мұнда сегіз бала тәрбиеленген.

Оқи отырыңыз: Ақтау балабақшасында күтуші қыздың үстіне ыстық сорпа төгіп алды

Газ тексерушілердің айтуынша, балабақшада бірнеше заңсыздық анықталған. Қосымша газ жабдықтарын орнатудан бастап, түтін шығаратын түтікті орнатуда өрескел заңбұзушылықтар анықталған.

Арнайы тексеру кезінде мамандар балалар тұрған бөлмеде көмірқышқыл газының қауіпті концентрациясын анықтады.