Журналистке белгісіз біреулер қорапқа малдың еті мен балаларының суретін салып жіберген
Журналист Самал Ибраева кеңсесіне белгісіз біреулер қорапқа малдың еті мен балаларының суретін салып жібергенін хабарлады.
Самал Ибраева қораптың сәрсенбі, 8 ақпанда кеңсеге келгенін, ішін ашқан кезде жоғарыда аталған заттар шыққанын айтты.
Ибраева оқиғаны «редакцияға жасалған қоқан-лоқы» деп бағалады.
«Президент тапсырма берсе де, маған жасалып жатқан қысымның артында кім тұрғаны анықталған жоқ. Осыған дейін қаншама қысым көрдім», — деді Самал Ибраева.
Ибраеваның жіберген суретінде етпен бірге балалардың суреті жатқаны көрінеді.
Сәрсенбі түстен кейін редакцияға полиция келіп, келген заттардан саусақ іздерін алған.
