Жұмысына кеткен: Атырауда ер адам 5 күннен бері іздестірілуде

0
1143

Атырауда 54 жастағы ер адам жұмысына шығып кетіп, қайта оралмаған, деп хабарлайды ҚазАқпарат.

Облыстық Төтенше жағдайлар департаменті баспасөз қызметінің ақпаратына қарағанда, «WDC» ЖШС-де күзетші болып жұмыс істеген Т. Оразалиев 6 наурызда үйінен шығып кетіп, қайта оралмаған.

«Департаменттің диспетчерлік пультіне 10 наурызда Атырау қаласының тұрғынынан 1967 жылы туған Т.Оразалиевтің 6 наурызда сағат 19.00-де үйден жұмысқа шығып, осы уақытқа дейін қайта оралмағаны туралы хабар түсті. Жоғалған азаматты іздестіруге 10 наурызда жедел құтқару жасағының 7 қызметкері, 4 кинологиялық есеп пен 4 техника жұмылдырылды. Сондай-ақ, еріктілермен (4 адам мен 2 техника) бірлесіп Бірлік, Ақсай, Жұлдыз-3 елді мекендерінде іздестіру басталды», – деп хабарлады департаменттің баспасөз қызметінен.

Іздестіру жұмыстары бүгін, 11 наурызда сағат 08:00-де қайта басталып, оған жедел құтқару жасағының 10 қызметкері, 3 техникасы (оның ішінде 2 кинологиялық есеп) мен жоғалып кеткен азаматтың 10 туысы тартылған.

Еске сала кетелік, бұған дейін Атырауда полиция мен құтқарушылар 30 жастағы жігітті іздеуге жұмылдырылған еді.

1$, 5$, 10$ ... Тәуелсіз KzNews жобасына қолдау көрсету