Домой Жаңалықтар Жетісайда өзгенің атынан несие алған бұрынғы банк қызметкері қолға түсті

Жетісайда өзгенің атынан несие алған бұрынғы банк қызметкері қолға түсті

0
548

Түркістан облысының полицейлері өзгенің атынан 2007 жылы тауарлық несие алып, алаяқтық жасаған бұрынғы банк қызметкерін ұстады, – деп хабарлайды Polisia.kz.

Жетісай аудандық ПБ-ға жергілікті тұрғын арызданды. Онда жәбірленуші ер адам, өзіне тиесілі есепшоттарының барлығы бұғатталғанын, ал банктерден себебін сұрағанында төленбей қалған несиесі барын біледі. Алайда өзі ешқандай несие алмағандықтан, бөтен біреудің заңсыз несие рәсімдеуі мүмкін екенін алға тартып, соны анықтауға полицейлерден көмек сұрайды.

Аталған жайтты полицейлер ҚК-нің 190-бабы (Алаяқтық) бойынша тіркеді.

Орын алған алаяқтық қылмысын тез арада ашып, күдіктіні құрықтау мақсатында ауданның қырағы полицейлерінен арнайы топ құрылып, жұмыс жасады. Оның ішінде Жетісай АПБ КПБ қызметкері Ғани Каленов екі тәулік бойы жан-жақты іздестіру шараларын жүргізді. Банктермен байланысып, ақпарат жинақтады.

Жинақталған ақпарат көздері арқылы күдіктінің ізіне түсті. Нәтижесінде полицейлер, күдіктіні Шымкент қаласындағы жалдамалы пәтерлердің бірінен ұстады. Ол бұрын банктердің бірінің несие жөніндегі менеджері болып жұмыс істеген, жергілікті тұрғын болып шықты. Белгілі болғандай күдікті азамат, өзінің қызметін асыра пайдаланып, тауып алған жәбірленушінің жеке куәлігін пайдалана отырып, 2007 жылы несие рәсімдеген. Яғни 89 мың теңгеге теледидар алып, тауарлық несие келісім-шартын жасап, өзі жәбірленушінің атынан қол қойып жіберген. Осылайша 14 жыл алдын жасалған қылмыс полицейлердің кәсіби шеберлігі арқасында ашылып, күдікті құрықталды.

Бүгінгі таңда тәртіп сақшылары күдіктінің осындай алаяқтық жайттарына қатыстылығын тексеруде. Сотқа дейінгі тергеу амалдары жүргізілуде.

Түркістан облысының полицейлері жергілікті тұрғындарға кез-келген құжатқа қол қоймас алдын жақсылап қарап, мұқият зерттеп барып әрекет жасауға кеңес береді. Сонымен қатар, құжаттарыңызға абай болуды, тіпті көшірмелерінің өзін ешкімге бермеуді ескертеді.