«Жеті шелпек — харам»: Этнограф маңызды мәлімдеме жасады
Этнограф Ақеділ Тойшанұлы қазақ дәстүріндегі өмірден өткен адамның рухына бағыштап, жеті шелпек пісіру дінге жат дейтіндерге жауап берді. Бұл туралы этнограф Qalam You Tube арнасына берген сұхбатында айтты, деп хабарлайды Kznews.kz сайты Caravan.kz-ке сілтеме жасап.
Маманның айтуынша, жеті шелпек пісіру ислам дінінің шарттарына қайшы келмейді.
”Жеті шелпек — ата-бабамыздан келе жатқан береке-бірлігі, татулығы. Бір сынық нанды бөліп жеп отырған береке. Ата-бабамыздан еншісі бөлінбеген алаш, дастарханы ортақ қазақпыз. Біз жеке тамақ ішпейміз. Бұл — соның көрінісі, бұрынғы ата-бабалардың алдында істеп жүрген салтымыз. Ал, енді басы жуылған, бірақ миы ауысқан сияқты болып қалып, тәрбиесіз қалып отырмыз. Сондықтан осы салт-дәстүрімізді сақтап, қазақ боп қалуымыз керек. Адасқан жолдағылар қалай болып жатыр? Сирияға барып, соғысып жүр. Энергиясын босқа кетіріп жатыр. Бірақ, сол энергияны қазақты дамыту үшін, спорт пен өнерге, кен орындарына салса, тау қопаоып тастайтын қыз бен жігіттер, батыр адамдар. Бірақ, шеттен келген дүниеге бастары дуаланып қалған. Қазақтың өзінің дінінен ауысқандар. Сондықтан, өзіміздің дінімізден, ділімізден айырылмауымыз керек”, — дейді ол.
Этнограф қазақта кімдер бата бермейтінін де түсіндірді.
”Қазақта әйел адам мен күйеу бала бата бермейді. Күйеу бала жасы қаншаға келсе де төрде отырмау керек. Қартайса, жезде болады. Қанша қартайса да ол әулетке қожайын бола алмайды. Күйеу ақсақал болып бата бергенше, жезде болып еркелеп жүру керек. Келін бата бермейді. Әкесі бар адамдар бата бермейді, бас мүжімейді. Әкесі өлгеннен кейін бата береді. Біз кейде құрдастарымызға әдейі бата бергіземіз. Ақымақ адам бата береді, сосын мазақ етіп күлеміз. Көп кешікпей әкеңді жұтасың дейміз. Әжелеріміз еркектер жоқ болса ғана бата беретін болған. Дастархан басында 13-ке толған бала болса, батаны сол береді. Кішкентай ер бала сәби ұйықтап жатса, аналарымыз үстінен аттамаған, ер азаматтың киесі ұрады деген. Бұл — ерлерді сыйлау”, — дейді Ақеділ Тойшанұлы.
