Жәнібек Әлімханұлы кәсіби рингтегі бесінші жеңісіне жетті

Қазақстанның 25 жастағы кәсіпқой боксшысы америкалық «Хитмэнді» нокдаунға түсірген соң, төрешілер көп ұзамай кездесуді тоқтатты

АСТАНА, 3 ақпан — Sputnik. Қазақстандық боксшы Жәнібек Әлімханұлы (4-0, 1 КО) кәсіби рингтегі бесінші жекпе-жегінде қарсыласын нокаутпен жеңді, деп хабарлайды Sports.kz.

АҚШ-тың Техас штаты Фриско қаласында өткен бокс кешінде 25 жастағы қазақстандықтың қарсыласы 28 жастағы америкалық боксшы Стивен «Хитмэн» Мартинес (18-4, 13 КО) болды. Сегіз раундтан тұратын кездесудің үшінші раундында Әлімханұлы Мартинесті нокдаунға түсіріп, бесінші раундта төреші жекпе-жекті тоқтатты. Осылайша, Жәнібек кәсіби рингтегі бесінші жеңісіне қол жетізді, ал қарсыласы карьерасында бесінші рет жеңіліп отыр.

Естеріңізге сала кетсек, Жәнібек Әлімханұлының кәсіпқой бокстағы ісін Top Rank промоутерлік компаниясы жүргізеді.