«Ұлы дала» байқауынан үздік шыққандар

Өткен жылдың соңында Елбасы «Ұлы даланың жеті қыры» атты мақаласын жария­лап, «Рухани жаңғыру» бағ­дарламасына тың серпін бер­гені бел­гілі. Соған байланыс­ты еліміз бойынша ауқымды жұ­мыстар қолға алынып, нақ­ты жобалар жүзеге асыры­ла бастады. «Ұлы дала» шы­ғар­машылық байқауы да сондай игі істердің бірі.

Барша жеңімпаздар мен жүл­дегерлерді құттықтаған Мәу­­лен Әшімбаев алдымен Елба­­сының «Рухани жаңғыру» бағ­дар­ла­масының маңызына тоқта­лып өтті.

– Елбасы «Болашаққа бағ­дар: рухани жаңғыру» және «Ұлы даланың жеті қыры» атты бағдарламалық мақалалары арқылы еліміздің идеология сала­сындағы жаңа кезеңді бас­тап берді. Өйткені бұл ма­қа­лаларда ұлттық кодты сақ­тап, тарихи санамызды қа­лып­тастыруға, сол арқылы рухани өміріміз бен ұлттық санамызды жаңғыртуға бағытталған нақты мәселелер көтерілген. Бү­гінгідей аумалы-төк­пелі заманда ұлт болып сақ­талып, тәуел­сіздігімізді мәң­гілік ету­дің қаншалықты маңызды еке­ні белгілі. Сол жолда осы ма­қа­лаларда айтылған ба­сым­дықтардың берері мол. Сон­дықтан Елбасы көтерген құн­­ды­лықтар мен идеяларды дә­ріптеу, еліміздің рухани жаң­ғы­руына үлес қосу – біздің бас­ты міндетіміз, – деді «Нұр Отан» партиясы Төрағасының бірінші орынбасары.

Партия бұл жобаны Қазақ­стан Жазушылар одағымен бір­лесіп ұйымдастырып отыр. Бұл байқау «Жастар жылы» аясында жас қаламгерлеріміздің шығармашылықпен айналысуына көрсетілген үлкен қолдау екені де сөзсіз.

Жалпы, байқауға 18 бен 40 жас аралығындағы қаламгерлер қа­тысты. Шығармаларды қа­был­­дау мерзімінің қысқа­лы­ғына қа­рамастан, 400-ден ас­там еңбек ке­ліп түскен. Нәти­жесінде, бес бір­дей аталым бойынша жеңім­паздар мен жүл­дегерлер анық­талды.

Атап айтқанда, «Проза» аталымында «Құдық басындағы екеу» шығармасымен қатысқан Мақсат Мәліков үздік деп танылды. Екінші орын «Медаль» атты туындының авторы Қа­нат Тілеуханға бұйырды. Ал үз­дік үштікті «Казахстанец» шы­ғар­­масымен Татьяна Кретова тү­йіндеді.

Сол сияқты «Поэзия» аталымында Жанат Жаңқашұлы – 1-орын, Нұргүл Маулина – 2-орын, Батырхан Сәрсенхан 3-орын алды. Үш ақын да бай­қау­ға өлеңдер топтамасын ұсын­ған.

«Драматургия, көркем фи­льм­дер мен телесериалдар сценарийі» аталымында таяу­да ғана «Qazaqstan» ұлттық те­леар­насынан көрсетіліп, көптің көзайымына айналған «Кейкі мерген» телесериалының сце­нарийін жазған Сержан Зә­керұлы топ жарды. Екінші, үшін­ші орындарды тиісінше «Ай­­сұлу» фильмінің сцена­рийі­­мен Айдос Ділдебай және «Әб­діғапар» драмалық туын­ды­сының авторы Абылай Мау­данов иемденді.

«Балаларға арналған шы­ғар­­малар» аталымында «Ұлы даланың жеті қыры» өлең­дер то­п­тамасының авторы Ба­уыр­жан Қарағызұлы бас жүл­­дені алды. «Ұлттық музейге экс­курсия» шығармасының авторы Асылан Тілеген екінші орынға табан тіресе, бай­қауға «Жылқы деген жануар» өлеңдер топтамасымен қа­тыс­қан Серікбол Хасан үшінші орыннан көрінді.

«Публицистика» аталы­мында 1-орын – Мақпал Жұ­ма­шеваға (шығармасы – «Көк бөрі тотемі»), 2-орын – Қанат Әбіл­қайырға (шығармасы – «Мұздауан Мұздыбай»), ал 3-орын Гүлбану Тебегеноваға (шығармасы – «Рухани жаңғыру – үштілділік») бұйырды.

Барлық жеңімпаздар мен жүл­дегерлерге қомақты қар­жылай сыйақылар тағай­ын­далды. Со­ған орай 1-орын иегер­леріне – 1,5 млн, 2-орын ие­герлеріне 750 мың, ал 3-орын алған қа­лам­герлерге 500 мың теңгеден берілді.

Байқаудың қазылар алқа­сының құрамында Төлен Әбдік, Алдан Смайыл, Несіпбек Айт­ұлы, Ұлықбек Есдәулет, Нұр­төре Жүсіп, Жүсіпбек Қор­ғас­бек, Көпен Әмірбек және Әлия Бө­пе­жанова сияқты белгілі қалам­герлер болды.

Бағашар ТҰРСЫНБАЙҰЛЫ,

«Еgemen Qazaqstan»