Украина Ресей азаматтарын шекарадан өткізбеу туралы шешім шығарды
Украина 16-дан 60 жасқа дейінгі ер азаматтарға ел аумағына кіруге шектеу қойды. Бұл туралы Украина президенті Петр Порошенко мәлімдеді.
«Шекарадан өткізу пункттерінде күшейтілген бақылау шаралары жүргізілуде. Бүгінде Ресей Федерациясының азаматтары үшін шекарадан өтуге қатаң шектеу қойылады. Жас шамасына келер болсақ, Ресей Федерациясының 16-дан 60 жасқа дейінгі азаматтарына тыйым салынды», – деді Украина Шекара қызметінің басшысы Петр Цигикал.
Бұған дейін, 8 қарашада Украина президенті Петр Порошенко мемлекеттік шекараны заңсыз кесіп өткен «агрессорлық мемлекет» яғни Ресей азаматтарын қылмыстық жауапқа тарту туралы заңға қол қойды. Ал былтыр Киев тарапы Ресей аннексиялаған Қырымға шекараны кесіп өтпек болған 100-ге жуық ресейлік азаматтарға қатаң тыйым салған болатын. Жоғары Раданың баспасөз қызметі хабарлағандай, жаңа заң жобасы Ресей мен ресейшіл, мүдделес мемлекеттерге қатысты. Заң ережелеріне сай, кеден бекетінен заңсыз өтпек болғандар немесе бір рет кесіп өткендер үш жылға, екінші мәрте өткендер бес жылға, ал қару қолданбақ болған азаматтар сегіз жылға дейін бас бостандығынан айырылады. Сондай-ақ, құжатсыз жүрген босқындар да жауапкершілікке тартылады.
