Тұтқындағы қырғыз экс-депутатын Қазақстан азаматтығынан айырған

0
130

Қазақстанда «контрабанда қылмысына қатысы бар» деген күдікпен ұсталып, Алматыда абақтыда отырған Қырғызстан Жогорку Кенешінің депутаты Дамирбек Асылбекуулу Қазақстан азаматтығынан айрылған, оған берілген Қазақстан азаматының паспортының күші жойылған. Бұл туралы Азаттықтың Қырғыз қызметі хабарлады. Дамирбек Асылбекуулуның қазір Қазақстанда өтіп жатқан сот процесіне Қырғызстан азаматы ретінде қатысып жатқанын Қырғызстанның Бас прокуратурасы Азаттыққа растаған.

2018 жылы ақпанда Алматыда трансшекаралық контрбандаға қатысы бар деген күдікпен ондаған адам, оның ішінде Қырғызстан парламентіндегі «Қырғызстан» фракциясы депутаты Дамирбек Алмасбекуулу бар, Қырғызстанның үш азаматы қоса ұсталған.

Оқи отырыңыз: Қазақстанда ұсталған Қырғызстан депутаты кім еді?

Кейін Қазақстан Сыртқы істер министрлігі Дамирбек Асылбекуулуның Қазақстан азаматы екені туралы хабарлаған. Депутаттың әкесі бұл ақпаратты жоққа шығарып, баласының Ыстықкөл облысы Қаракөл қаласында туғаны, сонда өсіп, білім алғаны және Қырғызстан азаматы екені туралы мәлімдеген.

Сәуір айында Қырғызстан Орталық сайлау комиссиясы Дамирбек Асылбекуулун депутаттық мандатынан айырған. Өзге адамдармен бірге айып тағылған Дамирбек Асылбекуулының үстінен қозғалған іс бойынша сот тыңдауы Алматы қаласының ауданаралық сотында қазанның 19-ында басталған. Сол күні Дамирбек Асылбекуулу Қырғызстан азаматы екенін мәлімдеп, өзінің ісін Қырғызстан сотының қарауына беру туралы өтініш айтқан.

Дереккөз: Азаттық