Түркістан облысында орамал дауынан соң жеті оқушы үш ай сабаққа келмеген
Түркістан облысы Мақтарал ауданындағы Фердауси мектебінде жеті оқушы 29 қаңтардан бері сабаққа келмей жатыр. Азаттықпен сөйлескен мектеп директоры Жанар Мамырова «ата-аналар оқушылардың құқұғын бұзып жатыр» дейді.
18 сәуірде Фердауси ауылының тұрғыны Сайдакбар Мирзаев пен оның інісі жеті баласын мектепке жіберуден бас тартқандарын Азаттыққа растады. Сайдакбар Мирзаевтың сөзінше, мектеп директоры Мамырова мектепке күзет қойған. «Күзетшілер қыздарыма боғауыз сөз айтқан соң [балаларым] қорқып қалған. Күзетті алып тастамаса, қыздарымды мектепке жібермеймін» дейді ол.
Мектеп директоры Мамырованың сөзінше, Мирзаевтар отбасындағы жеті қыздың сабаққа келмеуіне күзетші емес, орамал тағуға салынған тыйым себеп.
— Орамал тағуға тыйым салынғаннан соң мектепке бас киім киіп келді. Сабақта бас киіммен отыруға болмайтынын айтып оны да шешкіздік. Енді түрлі сылтаумен мектепке жібермей, оқушылардың құқығын бұзып отыр, — дейді директор.
Облыстық білім сапасын бақылау департаментінің өкілі Құдайберген Шербаев оқушылардың мектепке жібермей отырған ата-аналарға айыппұл салынып, хаттама толтырылғанын, қаулы шығарылғанын жеткізді. «23 наурыз күні әр ата-анаға 7 айлық есептік көрсеткіш мөлшерінде (17 675 теңге) айыппұл салынды. Бір айдың ішінде айыппұлды төлемесе, істі сотқа өткіземіз» деді департамент өкілі.
2018 жылы 5 қыркүйекте Фердауси мектебінде хиджаб дауы туған. Ормалмен сабаққа кіргізбеген мектеп әкімшілігіне орамал таққан оқушы қыздар мен олардың ата-аналары үш күн бойы наразылық танытқан. Сегіз ата-анаға әкімшілік айыппұл салынғаннан соң оқушылар мектепке дейін орамалмен келіп, сыныпқа шешіп кіре бастаған.
Видео: Фердаусиде хиджаб дауы жалғасты. 5 қыркүйек 2018 жыл.
2016 жылы қаңтарда білім және ғылым министрлігі бірыңғай мектеп формасы ережесі туралы №26 бұйрықты қабылдады.
Оқи отырыңыз: Орамал таққан оқушылар сабақты қалай оқып жүр?
Бұл ереже Ақтөбе, Батыс Қазақстан, Маңғыстау және Оңтүстік Қазақстан облыстарындағы кейбір мектеп пен ата-аналар арасындағы дау-дамайға себепші болды. Қабылданған ережеге сай, мектеп оқушылары пиджак, кеудеше, жейде, шалбар, классикалық жейде (қыс кезінде қалың кеудеше, сарафан) киюі керек. Мектеп формасына қатысты бұл талаптарды меншік нысанына қарамастан елдегі жалпы білім беру мекемелерінің барлығы бірдей орындауға міндетті.
